Mizo ṭhalaite leh zirna

Tun hnai USPC exam-a Mizo hming a lang lo chu chief minister Lal Thanhawla chuan Mizo ṭhalaite'n chonaah ngai se a duh thu a sawi chhuak.

UPSC exam-a Mizo hming a lang lo hi thil zahthlak tak a ni a, a sawi uar duh tan phei chuan hnam mualphona pawh a tling thei hial awm e. Chutihlaiin tun hma angin UPSC hi tehna sang berah ṭhangthar lehkhathiamte hian an ngai vek tawh bik lo a, Mizo ṭhalai lehkhathiam rual ṭhahnem tak hi UPSC lama kal loa management, information tech­nology, engineering leh zirna kawng danga kal ta zawk an awm tih kan hriat tel a ṭha awm e.

Hetihlai hian ram puma kan intehna langsar chu UPSC hnuaia exam hi a la ni lo thei lo a, Mizo hming pakhat pawh a lang lo hi a pawi hle. Tribal quota-ah pawh kan lang phak lo a nih chuan kan zirna hi ennawn a ngai a, kan zirna boruak (environment) chhia kan tih te, khawtlang leh kohhrana kan inhmang luih luih lutukte leh zirna tiṭhuanawm thei hlimhlawp lama kan tlan nasa lutukte hi kan inenfiah a ngai.

Zirnaah hma kan sawn loh chuan incheina leh intihhlimna lamah kal na eng ang mah ila awmzia a nei tak tak lo a, ṭha­laite pawm zawng sports leh music lamah thui tak kal mah ila zirna kalkawng tluang pangngaia kan hnufual tlat si chuan ram hmasawn kan ni thei ngai lo ang. Hei vang hian zirna sang zawk bei a, ngaihsan tur dik thlan thiam a, kan inennawn ngam a ṭul khawp mai.

Mizo zirlai, a bikin Mizoram chhunga zirte hian zirna hi tun aia an lâk run deuh a ṭha khawp mai. Zirna kalphung hi a fuh tawk lo a nih pawhin hlawhtlin loh chhan chhuanlam a tling lo a, tun hmaa zirna kan neih ṭhat loh lehzuallai pawhin Mizo ṭhahnem tak hi central service-ah an tling thei. Ṭhangthar zingah zirna lama kal bing ngam, nawmchenna leh intihhlimna aṭanga inthiarfilim ngam an chhuah zel a ṭul a, Mizoramin a mamawh a ni.

Sikul, college leh university-a zir­tirtrute pawhin an zirlaite hi UPSC examination hmachhawn ngam/ thei tur khawpin an zirtir chhuak em, tih ngaihtuah se; mahni hlawh san leh hamṭhatna phûta an beih nasat ang bawkin an zirlaite intihsiakna lian zawka sang taka an awm theihna turin tun aia uarin zirtirtu ṭheuhin an beih thar a ṭul khawp mai.

A tawpkhawkah chuan zirlai mimalah engkim hi a innghat a, hlawhtlin loh chhan chhuanlam zawn chuan thil tam tak a awm thei a, a mawhphurtu lian ber chu a mimal zel hi kan nih ṭhin avangin Mizo zirlaite an ṭan thar a ngai e.