Ngaihven hlawh MLP Act tihdanglam
Mizorama zu khapna dan hman mek The Mizoram Liquor (Prohibition) Act, 2019 siamṭhatna The Mizoram Liquor (Prohibition) Amendment Bill, 2025 chu March 10, 2025 khan Legislative Assembly session-ah pawm a ni.
Tun hma aṭang tawhin zu khap leh khap loh chungchangin Mizoramah boruak a nei lian ṭhin a, MLP Amendment Bill, 2025 pawhin boruak a nei lian viau. Assembly House-a MLA-te sawihona pawh mipuiin an ngaihven em em a, TV leh Youtube aṭanga entu an tam hle.
Assembly House-a MLP Amendment Bill sawihona thlirin, rorel lai MLA-te'n zu khapna dan tihdanglam chu Mizorama thlai/thei thar aṭanga beer leh wine siam phalna tur a nih thu leh kut hnathawktute hamṭhatna tur a nih thu an sawi tlangpui. Eptu MLA-te erawh chuan zu zawrh tumah sorkar an puh ngar ngarah a ngaih theih thung.
Excise Minister chuan MLP Act siamṭhat hmangin state dang aṭanga zu, beer leh wine lutte a hma aia khauh lehzuala do a nih dawn thu te, Mizorama thar thlai/thei hrang hrang aṭangin phalna (license) neia wine/beer siam phal a nih dawn thu te, kut hnathawktute lamṭang bill a nih thute a sawi.
MLP Amendment Bill, 2025 hi ngun taka thlirin, zu zuar tur anga sorkar puh tlat hi chu a dik lo deuhin a lang a; politics game chi khat - mipui rilruah sorkarin zu a zuar dawn anga ngaihtir tumna niin a lang. Chutih rualin, mi ṭhenkhat - khualzinte leh hmun dang aṭanga sorkar mikhualte tan zu neih theihna lai a awm niin a hriat a, Mizorama zu khap tlatna dan ang erawh a ni tawh lo thung.
Excise Minister sawi angin, MLP Amendment hi a taka kalpui a nih hunah Mizorama thlai/thei tharte aṭanga wine/beer siam a nih chuan mi tam tak tan a ṭha hlein a rinawm. Beer/wine siamte chu hralh a tla viau a nih phei chuan kut hnathawktu tam takin an thawh rim rah hlâwk zawkin an têl dawn tihna a ni.
MLP Amendment hi hman sual theih lai pawh a awm mai thei a; dik lo tak leh thil ṭha lo tih phahna atan hman a nih loh nan sorkarin a vil ngun a ngai. Dan siamṭhat hi a nihna ang taka kalpuia kenkawh a ni theih nan sorkarin hma a la zui tur a ni.