Dan loa hnathawktu lâk

Mizo Students' Union (MSU) chuan tun hnai khan chief minister Lal Thanhawla an hmu a; RUSA hnuaia dan lo leh advertisement chhuah loa thawktu mi 23 lak chu siam ṭhat an duh thu an thlen a, CM hian dan ang taka kal a nih theih nan hmalak a tum niin MSU lamin an sawi.

Mizoramah hian ṭhalaite'n sorkar hna ngei hi thawh an duh a, sorkar hnuaia hna awm ang angte hi a nghet lo a nih pawhin an inchuh nasa ṭhin hle. Sorkar hnuaia hnate thawh duhin lehkha hah takin an zir a, hna ruak a awmah tlin ngei tumin an exam a, nasa takin an inbuatsaih ṭhin. Hetihlaia advertise­ment pawh la loa hnathawktu an la fo hi chu ṭha­laite tan a rilru natthlak hle ang.

Mizoramah hian sorkarna chang apiang hian mipui an ngai pawimawh lo emaw tih mai tur a ni a, dan anga hnathawktu lak theih reng an duhsak zawngte thunna remchanga a ruk a rala an indah lut ṭhin hi a pawi hle. Sorkar hnuaia contract hna ṭhenkhata an duhsak zawng an dahte phei chu a rei hnuah a ngheta luh dan an zawng a, an luh danah dan angin lut lo mah se, a tawpah hna nghet an chelh leh a, he hna lo beisei vetute tan a hrilhhaithlak hle ṭhin a ni.

Home department hnuaia dan loa hnathawktu lak zat ringawt pawh hi sorkar tan chuan mualphona a tling a, sorkarna vawn fung chelhtu apiangin police leh a kaihhnawih department-a hnathawktu an dah ṭhin hi tihtawp a hun tawh hle. Tlemlai deuh khan SSA hnuaia hnathawktu an lak danah pawh induhsakna lian tak sawi ṭhin a ni a, tuna RUSA hnua a hnathawktu an lo lak dante pawh hi siam ṭhat a ngai khawp mai.

Sorkar hian a duh a nih chuan intluk tlang rengah chuan a duhsak zawngte chu a thun thei ngei mai a; nimahsela a tling lo leh hniam zawkte tlintir hi chu sim a hun tawh. A thiam leh tling zawkte hriat loha advertisement pawh chhuah loa a ruk a rala hnathawktu lak hi chu bansan tawh se, hetiang thil hi a tawp thlenga kan do ngam a ngai tawh hle a ni.