Lungawi lohna lantir

March 10, 2025-a Legislative Assembly session-a zawhna leh chhanna hunah Congress party MLA-in corruption case a neih thu sawih chhuah a nih chungchangah ri laih a awm a; chu chu Congress party lamin press release leh thil tih hmangin an ûm zui a ni.

March 11, 2025-a Congress party press release-ah chuan Chief Minister chu Congress MLA vauna thu sawiah puhin, thuphá chawi turin an phût tih an tarlang. Nimin March 12 khan Assembly House bulah punkhawm tumin an kal a, police nen an innawrnaah tianga invuak a nih avangin hliamte pawh an awm a; a zialo hle a ni.

Mizoramah political party hrang hrangin sorkarna an siam tawh a, eng party kaihhruai sorkarah pawh sorkar leh sorkar hotute chet dan vanga lungawi lohna lantir leh innawr buaina a lo thleng tawh ṭhin.

Lungawi lohna lantirtute'n kal phal loh china kal an tum tlat chuan anmahni lo dangtu police-te nen an innawr a ngai ṭhin a; indanna atan leh inhnawh darh nan tiang hmanga invuak te, mittui tlâkna hlo (tear gas)-te hman a lo ni tawh ṭhin. Chung avang chuan hliamte pawh an lo awm tawh ṭhin.

Lungawi lohna lantirtute hnawh darhna atana thawrum hmante leh hliam an awm phah hial ang chi hi tun hma aṭanga Mizorama awm ve fo a ni a; nimin March 12-a thil thleng pawh hi thil thar a ni lo a, han hriatthiam loh bik viau tur a awmin a lang lo. Chutih rualin, thil ṭha a ni lo a, thleng lo se duhthusam a ni.

Congress party mite lungawi loh chhan hi an âwm rêng em tihah ngaihdan a inang lo thei ang. Anni chuan àwm an ti a, lungawi lohna an lantir rêng a ni. Chutihrualin, mipui zingah a àwm loa ngaitu leh boruak (issue) siam tumna vanga ngaitu pawh tam tak an awm niin a hriat.

A tuate pawh hi kawng tinrengah kan fimkhur a ngai a, ṭawngkam pawh kan fimkhur a ṭul. Kan ṭawng hmain kan sawi tum dan chu mi dang tana huat theih leh mi rilru tina theih a ni leh nih loh te, mi awm tinuam lo a ni thei em tihte ngaihtuah hmasak a ṭha hle.

A lehlamah, mi thil sawi hriatthiam duh loh tlat leh lâk kawih tum luih tlat pawh a awm ve thei bawk a; chutiang mi chu nih loh a ṭha.

Isua'n, "Miin in chunga an tiha in duh tur ang zelin mi chungah pawh ti ve rawh u," a tih kha kan chêt dan leh ṭawngkam tinrengah kan hriat reng a ṭha e.