ICU siam belh a hun e

Mizoram chhunga damdawi-in hrang hrangte Vanglaini-in a be pawp a, intensive care unit (ICU) nei damdawi-in 14 an awm a, chu'ng damdawi-in ICU-a khum awm zat chu 82 a ni. ICU-a khum 82 zinga 28 chu sorkar damdawi-ina mi a ni a, khum 54 chu mimal leh kohhran damdawi-ina mi a ni thung.

ICU-a khum awm zat hi 82 chiah chiah a nih loh pawhin hei ai hian a takah a tlem thei a, chutih rualin hei aia tam zawk pawh hi a ni thei; thil lang chiang tak erawh chu Mizoramah hian ICU hi kan lo la nei tlem hle a ni. He mi kawngah hian rorelna vawn fung chelhtu MNF lam ringawt dem theih a ni lo a, a hmaa kum 10 chhung roreltu Congress lam pawh khan ICU siam lam hi an lo dah pawimawh tawk lo tih a lang.

Hetihlai hian ICU mamawh­na hi engtiklai pawhin a sang reng hran lo a, Covid-19 hri a len tak avangin ICU mamawhna hi a sang zual a ni. Mizoram sorkar hian hripui len tirh khan ICU hi a nei tlem a nih chuan dem hleihtheih pawh a ni lo a, kan ram dinhmunin a zir lo deuh tihna a ni mai; nimahsela hun rei tak hriin min chiah tawh hnu pawha heti zat lek ICU kan la nei hi chu sorkarin Covid-19 dona hi a ngai pawimawh tawk loa puh loh theih loh a ni. 

Hri dona atana mipui pawisa thawh khawm ringawt pawh kha a ṭhahnem tham hle a, sorkar sum awm sate nen ICU hi chu tun aia tam neih a hun tawh takzet a ni. Sorkar hian damdawi lama kan inenkawlna hmanrua (health infrastructure) kan neih ṭhat tawk loh hi an sawi leh ṭhin a, kan ban phaka kan tih ve theih chinah pawh kan ti ṭha tawk lo tih a takin a lang mek a ni. 

ICU siamna tur te, ventilator tam zawk hman theihna tur buatsaih nan kha leh chen kha hun kan nei a, heng thil pawimawh bik atan hian sum awm loh chhuanlamah hman a thiang lo a, hemi kawngah kher hi chuan Mizoram sorkar hi a muthlu rei deuh tiin a puh loh theih loh.