Kawlphetha hman man pun loh

Mizoram Electricity Regulatory Commission (MZERC) chuan March 12, 2025 khan financial year 2025-26 chhunga Mizorama kawlphetha hman man (power tariff) thar atana rawtna chungchang sawihona (public hearing) an buatsaih.

MZERC hearing-ah hian Mizoram sorkar (Power & Electricity) aṭangin kawlphetha hman man tihpuh rawtna a awm lo tih tarlan a ni a; power tariff chungchanga rawtna leh sawiselna thlen theih chhungin mi/pawl pahnih chiahin rawtna an thlen tih tarlan a ni bawk.

Mizo mipuite'n kawlphetha hman man a sanin kan sawisel thuai zel a, sorkar kan dem ṭhin a; opposition party-te'n sorkar neih nan an hman ṭhin bakah, power tariff tihsan apiangin thâwm an neih fo.

Kawlphetha hman man pungah mipui kan bengvar viau laiin, power tariff chungchanga rawtna leh sawiselna thlen theih chunga Commission hnena thu thlen erawh an tlem ṭhin hle. Hei hian thil eng emaw hlek kan sawisel peih viau laiin, mi tam ber hi chuan thil tak tak kan ti peih lo tih a entir tihna a ni thei àwm e. Hun lo la kal zel turah chuan rawtna, duh dan leh sawiselnate thlen theih hun laiin thlen nachang hre ṭhin ila a ṭha hle ang.

Tarlan danin, financial year 2023-24 leh 2024-25 ah kawlphetha hman man tihpun a ni lo a, kum 2025-26 ah pawh tihpun a ni dawn lo. Tuna sorkarna chelh mektute hi tun an sorkar hun chhunga power tariff tihpun tum loa insawi an ni a; kum tharah pawh power tariff tihsan rawt a ni lo hi an lo sawi tawh an tihhlawhtlinna a nih a hmel.

Kawlphetha hman man sorkarin a tipung lo hi mipui tan chuan a lawmawm em em. Chutih rualin, sorkar tan sum sên a tam phah ngei dawn a; state rethei, thawh chhuah nei tlem tan hetiang renga kal hi chu thil fuh tak a nih lohna lai a awm thei ang.

Kawlphetha hman man tihpun loh hi mipui tan a lawmawm em em karah hian, state sorkar sum dinhmun tichhe zualtu leh nakina harsatna lian zawk thlentu a nih loh nan fimkhur taka sorkar a kal a ngai e.