Mizote leh health care

Sorkar kum liam ta 2014-15 chhung khan Mizoram State Health Care Scheme (MSHCS) chuan damlo mi 7,843-te inenkawlna senso atan Rs. 12,35,32,722 a pe chhuak. Sum pek chhuah zinga Rs. 6,08,79,793 chu Cancer leh Hepatitis-C veite tana hman a ni a, sen zawng zawng zinga 49.28% a tling.

Kum 2014-15 chhung khan HCS-ah mi 66,037 an inziak lut a, chungte chu Below Poverty Line (BPL) chhungkua 50,020 leh Above Poverty Line (APL) chhungkua 16,017 an ni. Damlo MR bill an pek tawh hi mi 7,843 an ni a, inziak lut zawng zawng aṭanga tehin 11.88% an ni.

Mizo zingah damloh nikhuaa sum sen tur nei lo khawpa rethei chhungkaw tam tak an awm a, hengte tan hian HCS hi a ṭang­kai hle. Hetihlai hian sorkar hnathawkte erawh chu sorkarin duhsak takin an damloh nikhuaa an sensote a rulh lêt sak ṭhin a, hei hi mi tam takin sorkar hna an thawh duh chhan ber pawh a ni. Sorkar hian a hnathawkte hmakhua ngaia an damloha inenkawlna senso a tumsak ang bawk hian, sorkar hnathawk lote tan pawh inenkawlna siamsak hi a mawhphurhna a ni a, tuna HCS a kalpui mek pawh hi hei aia changtlung zawk hian siam thei se a ṭha khawp mai.

Mizote hi a hnam pum ang hian pawisa khawl ngai pawimawh vak lo, damloh nikhuaa inenkawlna tur pawh dahṭhat nachang hre mang lo kan niin a lang a; hnam dang, kan lakluh zat ang tho lalutte hi hemi kawngah hian kan tluk lo hle. Mahni inenkawlna tur sum pawh nei lo, mobile phone handset changkang leh lirtheite thlenga nei theite pawh kan awm a, a inhmeh lo hle a ni.

Sorkar-in sorkar hnathawkte damlo inelkawlna duhsak taka a siam thei a nih chuan, sorkar aṭanga hlawh la ve lote zawk tana health care scheme changtlung zawk siam dan ngaihtuah se, tuna a kalpui mek hi mipuite pawhin i chhawr thiam ang u.