PAHOSS tihtawp hlen ni se

Urban Development & Poverty Alleviation department Minister chuan, sorkar hmasain Aizawla traffic tâwt lutuk tihziaawmna atana a kalpui Parking House Support Scheme (PAHOSS) chu kalpui zel an tum loh thu March 13, 2025 khan Assembly session-ah a sawi. PAHOSS atana sorkar sum sen tawh zat chu nuai 1,136.4 a nih thu a sawi bawk.

PAHOSS hi February 6, 2019 khan khatih laia Chief Minister-in a tlangzarh. Kalpui ṭan tirh financial year 2018-19 ah cheng vbc. 10 vel dah phawt a nih thu leh, kum (financial year) dang zelah chuan vbc. 60, 70 te, a ṭul chuan vbc. 100 thlenga dah tum a nih thu CM-in a sawi a ni.

A tira sorkar ruahman dan chuan, PAHOSS hnuaiah hian lirthei LMV pakhat dahna siamna atan Rs 1,00,000 leh two wheeler paruk zel atan Rs 1,00,000 pek theih a ni. Ṭanpuina chu rulh leh a ngai lo a, ṭanpuina dawngtuin parking a siama lirthei dah man a lakte pawh sorkara chhùn luh ngai lo a ni bawk. Ṭanpuina dawngte tan chuan hlêp hlang tak tak a ni a, a lawmawm duh hle ang.

PAHOSS chu kalpui a ni a, mi tam takin sorkarin aṭangin rulh lêt ngai miah loin in sak ṭanpuina cheng nuai tél an dawng a ni. Ṭanpuina sum tam tak pek zingah Aizawl khawpuia traffic jam-in a tihbuai rêng rêng loh - veng pènhleh leh khawpui daiféma mite an awm nawk a; MLA ni laite an lang chho nawlh nawlh bawk.

Sorkarin PAHOSS ṭanpuina a pek zingah scheme-in a tum ang taka hlawhtling a awm mai thei a; a tam zawk erawh chu scheme-in a tum nen a inpersan a, scheme thiltum a hlawhtlin phah lo tih a hriat. PAHOSS hi khawi laiah emaw chuan mipui vatlang tana ṭangkaina lai a awm a ni thei a, mahse, a tlangpuiin a hlawhtling lo hleah a ngaih theih.

Aizawl khawpui traffic tâwt lutuk tihziaawmna tura duan PAHOSS-ah sorkar sum nuai 1,136.4 lai sen a ni hi scheme-in a tum ber a hlawhtlin loh dan ngaihtuahin, a uiawm hle. Mimal tlemtêin lo hlâwkpui mah se, sorkar leh mipui tan hlohna lian tak a ni tih theih a ni.

Sorkarin scheme hlawhtling lo tak leh sorkar sum tam tak sen thlawnna PAHOSS kalpui zui a tum lo hi a lawmawm a; tihtawp hlen ni se a ṭha zawkin àwm e.