Ram danga thawhna turah fimkhur

Mizo ṭhalaite'n Taiwan-ah hna an thawh theih nan Mizoram Youth Commission leh TOP International Human Resources Management Consulting, Taiwan ten March 14, 2025 khan Aizawlah thawhhona tur 'Letter of Intent an ziak.

Thawhhona hmang hian TOP International Human Resources Management Consulting-in MYC-ah Rs 50,00,000 an pe dawn a, chumi hmang chuan MYC-in Aizawlah Chinese ṭawng zirna, Mandarin Language Learning Centre an din ang. Mandarin zir chhuakte chuan Taiwan-ah hna an thawk zel thei dawn a; Mizo ṭhalai 1,000 thawn tum niin, bul ṭan nan mi 100 thawn tum a ni.

Mizo ṭhalaite'n Taiwan ramah hna an thawh theihna tur kawng sial a ni hi thil ṭha tak a ni. Thuthlung an ziah ang taka ṭha tak leh tluang taka kalpui a nih chuan Mizo ṭhalai ṭhahnem takin an hlâwkpui ang a, chhungkaw tam tak leh Mizoram pawhin a hlâwkpui a beiseiawm.

Mizoramah ṭhalai lehkhathiam an pung tial tial a, hna thawh tur erawh a váng tial tial emaw tih tur a ni. Mizoram ṭhalai lehkhathiam zawng zawng hi Mizoram chhunga hnain a daih vek lo tih kan hre tlang a; ṭhalaite'n Mizoram pawnah hna thawk tura rilru kan siam a ṭul a, thawk thei tura inbuatsaih a ngai bawk.

Mizo ṭhalaite'n ram páwnah thawh duh ringawh mah se, duh duha kala thawh mai theih a ni loa kawnghmang hriate'n an kawhhmuha an kaihhruai a ṭul.

Ṭhalaite kawng kawhhmuh zawng leh pui tura MYC-in hma a la hi a lawmawm em em. Thawhhona an neih pawh hi a taka a puitlin a, Mizo ṭhalai tam takin hna an hmuh phah ngei theih nan theihtawp chhuah zui se. Taiwan mai ni lo, ram dang dangahte pawh ṭhalaite'n an thiamna mil tâwk ang zela hna an hmuha an thawh theih nan kawng zawnpui zel thei se.

Hetih lai hian, tun hma aṭang tawhin Mizoram páwna thawk Mizo ṭhalai zingah harsatna tâwk eng emaw zat an lo awm tawh a; ṭhenkhat chu sorkar inrawlh ngai leh sorkarin an hawna tur an ngaihtuahsak hial ngaite a ni.

Tuna Mizo ṭhalaite'n Taiwan rama hna an thawh theihna tur kawng sial chhoh mek hi fimkhur taka kalpui ni se; ram danga hna thawhna tur ṭhalaite an zawnpuinaah pawh fimkhur taka hmalak zel ni rawh se.