Political party ngaihdam dilna

Mizoram Pradesh Congress Committee chuan thuchhuah siamin, an party chanchinbu, Congress Thlifim-a pastor zinga MLPC Act do nasa thlanna tura questionaire an siam chu pawi an tih thu an tarlang a; Congress Thlifim chu tihtawp a nih thu an puang.

Mizo mipui tam takte'n mak an tih khawp thuchhuah chungchangah hian MPCC chuan, "Mizo­ram mipui leh kohhran chungah ngaihdam kan dil a, questionaire hi party thuchhuak ni loin, chanchinbu enkawltu mi tlemtê tih a ni. He thil hian party hruaitute pawh a barakhaih bakah, tumahin ṭha an ti lo a ni," an ti.

Political party-te hian vawi tam tak mipui hnenah hian ngaihdam an dil tawh a, mipui hian ngaihdam dil na na na chu an lo hrethiam deuh zel niin a lang. Congress pawh hi hun rei fê ro an rel hnuah an tla a, eptu lama an awmlaiin an party president-in mipui hnenah ngaihdam a dil a, mipui pawhin an ngaidam a ni ngei ang hneh takin term hnihna atan an tling leh mek a ni.

Ngaihtuah ngun ngai tak erawh chu, 'Ngaihdam dil leh sim hi chu thil hrang daih a ni,' tih hi a ni awm e. Political party-te hian ngaihdam dil mai hi an harsat lem lo niin a lang a; nimahsela an thil tih hi an sim nge sim lo tih hi mipui pawhin an enthlak zui a ṭha khawp mai. Mipui lam ngaihdan thlir ranin an party-ah nghawng ṭha lo a neih dawn chuan rang taka ngaihdam dil mai hi chu an thiam khawp mai a, an rilru put hmang an thlak leh thlak loh hi a pawimawh lai tak chu a ni.

Ram tana ṭha lo tur thil thleng­ah pawh rang taka ngaihdam dil hi ching se, sim zui bawk se a ṭha a; tuna thil thlengah hi chuan party tana thil ṭha lo a thlen palh hlauhthawn vanga ngaihdam dil an ang ber a, political party-te ngaihdam dilna hi simnain umzui ngei tawh se a ṭha ang.