Doctor transfer

Health department hotute chu tun hnaiah an ṭhukhawm a, doctor transfer leh posting-ah Department Transfer Norms thar hman an duh thu an rel a; Health worker-te pawh rualkhai zawka posting siam an duh thu an sawi bawk.

Mizorama kan buaina lian tak pakhat chu sorkar hnathawk zingah thu bik ang maia khawsa, hotute tilawm thiam bik, an duhna hmuna awm thei zel an awm ṭhin hi a ni. Sorkar doctor rawih mekahte pawh hian hei hi a dik chiah a, hmun ṭha bika awm thei reng mai, khawpui pawna sawn theih loh anga inngai hialte pawh an awm a, a zia lo hle a ni.

Sorkar doctor-ah hian a thiam bik leh mipuiin an mamawh bikte chu an awm lo thei lo a, heng mite hi khawpui leh mihring tamna lama an awm hi a inhmeh hle a ni. Chutihlaiin thiamna bik pawh nei lem lo, tute emaw hmelhriat leh chhung hnai nih vanga hmun ṭha chuh chak bik hi an awm ṭhin a, hei hian thawhhona boruak a tichhia a, thil fel taka kalpui a harsat phah ṭhin.

Health department hotute'n doctor transfer leh posting an ngaihtuah ruala Health worker insem rual lo an ngaimawh thu an sawi chhuak hi thil lawmawm tak a ni a, hei hi doctor lam tan inenletna ṭha tak a ni thei ang. Damdawi thiamna lama sang lo zawk Health worker insem rual tawk lo mah a ngaimawhawm a nih chuan, doctor insem rual lo phei chu ngaimawh loh chi a ni lo.

Sorkar damdawi-in a dinna hmunah chuan sorkar hnuaia hnathawk duh doctor-te hi chu an awm thei vek tih inpawm se, mihring tamna hmuna an mamawh ang tho hian hmun kilkhawr leh pan harsa zawkte pawh hian doctor an mamawh a, sorkar hnuaia hnathawk duh doctor chu sorkarin a mamawhnaah a kal mai tur a ni a, insawipuia hmun ṭha chan tum reng hi tihtawp ngam a hun ta.