AR chhuahsan ram venhim hmasak
Aizawl khawpui lailia Assam Rifles battalion headquarters leh hmun dang ṭhenkhata AR hmunte chu Zokhawsang lamah sawn tak tak a ni chho a, ram pawh inhlan a ni ta. Hei hi Mizoram mipui tam zawk duh dan niin a lang a, sawn chhuah an lo ni ta hi a lawmawm hle.
AR sawn chhuah an nih theih nan hian Mizorama sorkar ding tawhte leh tuna sorkar mekte'n an phâk tâwk ṭheuhah hma an la vek a, sorkar hrang hrangte hmalakna infâwk khawm chuan tun dinhmun hi a thlen ta a ni. Chuvangin, infak bik nan emaw, party dang sawisel nan emaw hman loh zui a ṭha ang.
AR sawn chhuah an nih ruala mipui rilrua lian tak mai chu–AR-in an chhuahsan tak hmun ruak hman zui dan tur a ni. Mi tam tak rilruah chuan mimal leh pawl ṭhenkhatin hmun an neih mai te, a ṭawp sawt hlauhthawnna te, ruihhlo tihna hmuna a chan hlauhthawnnate a awm niin a lang.
Pawimawh hmasa chu–hmalakna thar neih nghal thuai thuai aiin, humhalh leh venhim a ni. AR chhuansan hmun hi tihchingpen a nih loh nan leh humhalha venhim a nih theih nan sorkarin hma la zui nghal ngei rawh se.
AR an awm lai chuan inthununna leh venhimna ṭha tak hnuaia enkawl a ni a, a fai ṭha a, ṭawp leh hnawk a awm vak lo. Sipai enkawlna hnuaia a awm tawh loh hnuah pawh a hma ang thoa hmun fai leh thianghlim, Aizawl khawpui vawng daitu leh timawitu a nih zel theih nan enkawl zui zel ni se; chumi tur chuan khuahkhirhna pawh neih a ṭulin a rinawm.
March 13, 2025 khan Assembly session-ah Chief Minister-in AR chhuahsan ram hman dan tur ngaihtuahtu committee din a ni dawn a, political party tin leh tlawmngai pawlte an tel dawn thu a sawi. Committee hi din thuai ni se a ṭha hle mai.
CM sawi danin, AR chhuahsan ramah hian Assembly House mawi leh zahawm tak dah tumna a awm niin a lang. Tuna Mizoram Assembly House hi kawngpui kam maiah a awm a, a chêp avangin session apiangin traffic jam a nasat phah a, a building hrim hrim pawh state dangte Assembly House ngaihtuahin a sitawm deuh bawk. AR sawn chhuah a nih tâkah chuan hmun remchang ṭha lai takah Assembly House awm se a inhmeh ngawt àwm e.