Treasury Square bazar tihtàwp

March 17, 2025 zingah Aizawla Treasury Square bazar a kâng a, dawr 64 leh pawl pakhat pisa a kâng rala sawi a ni. Mi tam tak eizawnna hmun a kâng chhia hi a pawi hle.

Treasury Square hi Aizawl khawpui mai ni lo, Mizoram pum tan hmun pawimawh a ni. Rorelna inpui - Assembly House awmna, state sum báwmpui awmna, state chhunga lal ber Governor awmna, district administration hmun leh sorkar pisa tam tak awmna a ni a; Mizoram hnuk awmna ti pawha sawi theih a nihna lai a awm.

Chutiang taka hmun pawimawh lai ni si-ah chuan hun rei tawh tak aṭangin chawhmeh bazar - thlai, sa thil dang dang zawrhna a awm a; hei hian Mizorama hmun pawimawh ber tia chhàl ngam hmun hi a tiṭawp tih hi mipui náwlpui hmuh dan niin a lang a, mi tam tak chuan tihtawp theih ni se an duh hle niin a hriat bawk.

Treasury Square bazara thil zuartute ngawr ngawr hi chu an che felfai viau a, an hnâwmhnawk leh bawlhhlawh neihte pawh an senghawi ṭha thawkhat a ni mai thei. Mahse, chumi-ah chuan tàwp mai loin, ken tel a nei a; ruihhlo ti ṭhinte'n chêttlatna hmunah an hmang ṭhin a, chu chuan a tiṭawp zual. Venhimna lam thilah harsatna eng eng emaw a siam thei bawk àwm e.

Aizawl khawpui hi vawn fai leh thianghlim a ngai a, sorkar hmunpui Treasury Square báwr vel phei chu a ṭul lehzual.

Heng chhan hrang hrang avang hian Treasury Square bazar hi tihtawp theih ni se, ram leh mipui náwlpui tan thil ṭha zawk a nih a rinawm a; Aizawl mipui mai bakah, Mizoram mipui náwlpui duh dan pawh a nih a rinawm.

Treasury Square Bazar hi tihtawp a nih pawhin, thil zuar ṭhinte tan a thlang lawkah bazar building lian ṭha tak a awm a, Treasury Square bazara thil zuar ṭhinte chu an leng veka sawi a nih bawk avangin thil zuar zui zel duhte tan chuan eizawnna hmun dang an nei tho dawn a ni. Hemi chungchangah hian thuneitute huaisen takin hma la zui se a duhawm hle.

Khawlaia ei tur chi hrang hrang zawrh ai chuan in chhunga zawrh chu a thianghlim zawkin a rinawm a, thil zuartute leh anmahni dawrtute himna atan pawh thil ṭha zawk a ni ngei ang.