Mizorama pawl hrang hrang

Chief minister Lal Than­hawla chuan, Mizorama pawl (association) awm zinga a tam zawk chu sorkar dodal pawl leh sorkara innghat an nih thu a sawi; pawl hrang hrangte chuan ṭhatna an neih leh neih loh a ngaihtuah fo ṭhin thu a sawi.

Chief minister sawi ang hian Mizoramah hian pawl hrang hrang an tam hle a, pawl ṭangkai leh ṭha tak tak an awmlaiin pawl ṭang­kai lem lote pawh an awm ve bawk. Pawl ṭhenkhat hi chu sorkara innghat an ni ngei a, sorkar aṭanga eng hamṭhatna emaw dawn beisei vanga din mai maite pawh an awm a, sorkar tel loa kal thei lo tur pawl tam tak an awm.

Pawl ṭhenkhatin sorkar an do reng tih chief minister sawi hi thil mak a ni lo a, sorkar dotu pawl hi chu an awm ve reng tur a ni zawk ang. Sorkar thiltih apiang thlawp a, sorkar lam ṭang nih vek hi thil theih a ni lo. Sorkar do pawl nia langte pawh hi sorkar khalh ngiltu pawl leh siam ṭhatna rilru pute pawh an ni zawk thei a, hengte hi ngaimawha hnawk tih lam aiin an ṭangkaina chhawr thiam hi sorkar tan a ṭha zawk awm e.

Mizorama thil buaithlak tak erawh chu pawl din kan sam lutuk hi a ni. Pawl tam zawk hi chuan ram leh khawtlang ṭhatna lam an ngaihtuah lem lo a, anmahni hamṭhatna tur maia pawl din an ang ber. Pawl ṭhenkhat erawh tum fel tak neia din an ni a; nimahsela an kal thui a, an pawl a lian deuh deuh a, thiltithei deuha an inhriat ruala kal sual tate pawh an awm. Mahni pawl din chhan theihnhgilh ṭhaka kal a, sorkar thil zawng zawnga inrawlh tum ang maia puh theih pawlte pawh an awm ta.

Pawl kan din dawn a nih chuan tum leh tih tur fel tak nei ni ṭhin se, mahni hmasial vanga tute emaw thurualpui tur sawm belh ang leka pawl kan din ṭhin hi a vanduaithlak. Sorkar aṭanga hamṭhatna dawn tum ringawta pawl din phei chu an zahpuiawm thei hial zawk a; chutihlaiin sorkar do pawl leh sorkar khak ngam pawl awmte pawh hi ram hian mamawhna chin a nei ve bawk ang.