Kângmei lakah fimkhur zel ang u

Mizoramah kumina ṭhálvaêkchâr a thlen tak tak hma, February 10-15, 2025 chhung khan kângmei vèn hapta–Fire Prevention Week hman a ni. Week thupui chu 'Kângmei vèn hi kan tu leh fate hmakhua tan a ni' tih a ni a, a theih ang angin mipui vantlangah kângmei vên pawimawhna leh a ṭul dante inzirtir a ni.

Kângmei ven hapta hi Mizoramah kum 2009 aṭangin kum tin hman a ni a, kângmei chhuak pawizia inzirtir a ni ṭhin. Inven a pawimawhzia leh inven dan turte kan inzirtir tam tawh a, kângmei chhuak pawizia Mizoram mipuiin kan hre tlangpui tawh a, mahse, ṭhál lai leh hun dangah pawh ram leh in kâng hriat tur a awm ṭhin.

Kuminah ṭhál laia ram a kan loh nan leh lo hâlna aṭanga vah bâk ram a kan loh nan district tina bawrhsapte'n hriattirna thupek chhuahin, lo hâl hun pawh bithliah. Mi náwlpui tana lo hâl theih hun a tawp tawh a; ṭul bikna avangin hmun ṭhenkhatah leh kut hnathawktu ṭhenkhat tan lo hâl hunah ngaihhnathiamna pek tlem azawng an awm bawk.

Hetih lai hian, tun hnaia kângmei chhuak hriat tur a awm nual. Tun kar tìr lamah pawh Aizawla hmun laili taka bazar a kâng a, dawr sawm ruk chuang a kâng chhia. Hmun hrang hrangah ram kâng leh in kâng hriat tur a awm zauh zauh a, mihring kâng hlum pawh hriat tur a awm.

Kângmei chhuak zinga a tam ber hi chu fimkhur loh vang niin a lang a, chutih rualin, vanduai vang tak tak leh vên sên loh thil pawh awm thei a ni. Tunah khua a ṭhàl vanglai a ni mek a, kângmei chhuak lo tura inven fimkhur a ngaih lai ber hun kan thleng mek.

Kângmei chhuakin chhiatna leh harsatna a thlen nasat theihzia hretu vek kan ni a, kan fimkhur em em reng a ṭul. Kan in leh lo, kan neih ro hlute kan chàn loh nan kângmei lakah fimkhur chi kima kan fimkhur a ṭul a, theihtawpin i fimkhur zel ang u.