MUHCS-ah theihtawp chhuah ni se

Mizoram sorkarin a khua leh tuite damdawia inenkawlna senso a tumsakna tur Mizoram Universal Health Care Scheme chu March 19, 2025 khan Chief Minister-in a tlangzarh a; April 1, 2025-a hman ṭan tur a ni.

Mizote hi a náwlpui ang chuan inhmakhua nacháng kan hre tâwk lo ṭhin. Insurance lam tih nachang hre lo kan tam a, health insurance lam pawh tih nachang kan hre lo fo; damdawi-ina inenkawl kan ngaih chiahin kan inchhîr leh ṭhin. Nakina buai loh nan healthcare scheme-ah hian sorkar hnathawk awm lohna chhungkuate chu inziah luh vek ni se.

Sorkarin healthcare scheme a lo neih tawhah damdawia inenkawlte'n kum chuang fe an nghah a ngai ṭhin a, hun rei tak tak sorkarin bill a ba ṭhin.

MUHCS-ah chuan damlote'n damdawi-ina inenkawlna man an pek a ngai dawn lo a, sorkarin damdawi-in hnenah a pe mai dawn. Hei hi thil ṭha tak a ni; ruahman ang taka kalpui a nih chuan damlote harsatna a chhâwk hle ang. Ni 30 chhunga bill pek turin sorkarin a ruahman a, hun tiam chhungin bill pe zel ngei rawh se.

Sorkar hnathawk awm lohna chhungkaw pakhatin kum khat chhungin cheng nuai 5 hû thleng a thlâwnin an inenkawl thei dawn a, sum hman theih chin scheme hmasate aia a lêt chuanga tihpun a ni hi a lawmawm.

Inziah luhnaah damdawi-in general ward-a awm duh tan Rs 2,500, semi private ward-a awm duh tan Rs 5,000 leh private ward-a awm duh tan Rs 10,000 pek a ngai. Pawisa pek tur zat hi Mizorama sorkar damdawi-inte dinhmun ngaihtuahin, ruahman angin kalpui theih a ni ang em tih ngaihtuah tham a ni.

Semi private emaw, private ward emawa awm tura pawisa pete chuan damdawi-ina awm a ngaih hunah pawisa an pek mil ward-ah an awm an beisei ngei dawn a; chu chu an dikna chanvo tia sawi theih a ni ang.

A tak takah erawh chuan Mizorama damdawi-in hrang hranga semi private leh private ward-te hian a daih loh hun a awm thei a, mipui lungawi lohna thlentu a nih hun pawh a la thleng thei.

Harsatna leh lungawi lohna thleng thei pumpelh nan damdawi-in hrang hrang tihchangtlun hi pawimawh hmasa a ni; muangchang loin sorkarin damdawi-inte a tihchangtlun ngei a ngai. MUHCS kalphung duan ang taka ṭha taka a kal theih nan sorkarin theihtawp  chhuah rawh se.