Assembly House zahawmna

Mizoram Assembly budget session chu March 20, 2025 zan khan a zo ta a, tluang taka session nei a, ṭha taka zawh a ni ta hi a lawmawm.

Tun ṭum session-ah khan member-te inhnial fo a, ṭawngrinna tihtawp ngai khawpa inhnial ṭumte pawh a awm. India rama ram rorelna ina thil thleng ṭhin pangngai anga ngaih theih a ni a; chutih rualin, House zahawmzia an sawi ṭhin dan nen a inmil loah a ngaih theih bawk.

Assembly House hi state chhunga rorelna in sang ber a ni a, a zahawm em em. Rorel inkhawm chhimtute tan phone hman phal a ni lo a, mutthlûk phal a ni lo a, bawp khawkherh pawh phal a ni lo. Hengte hi chhimtute chuan an zâwm ṭha viau zel.

MLA-te pawhin House zahawmzia an sawi chàmchí a; mahse, chu House zahawm taka ṭhua rorel ṭhinte chêt dan leh ṭawng dan erawh a zahawm vek lo tih a lang. Kan ram (state) roreltute rorelna in sang bera member ṭhenkhatte chêt dan leh an ṭawngkam hmante hi anmahni leh mipui hian zahawm an ti ang em tih hi ngaihtuah tham a ni. Member ṭhenkhat chêt dan enin, House zahawm tak zahawmna tibawrhbángtu an ni mai lo maw?

House chhunga member ṭhenkhatte chêt dan leh ṭawng duh dan tam tak hi chu khua/venga KṬP/YMA committee rorel dan ai pawhin a zahawm lo zawk. Ṭawngkam an hman tam tak hi chu khawi lai emawa zu rûi titi ṭawngkam àwm takte pawh a ang. Hemi chungchangah hian rorel lai leh eptu member te, hotu ber thlengin an bâng lo.

Rorelna in sang bera déngkháwng tak tak hman hi khingpuite beih zui nan an duh a ni mai thei; mahse, party àwn lam nei lote thinlungah erawh an tlâk nat loh phah zawkin a rinawm. MLA-te hi House-a an chêt danin sang takah a vawrh thei a, mualpho takin a siam thei bawk; chutiang chu tun ṭum session-ah pawh an awm àwm e.

Assembly House hi state-a rorelna in sang ber leh zahawm bera ngaih a nih ang tak hian chu hmuna ṭhute chuan ṭawngkam mawi leh hawihhâwm an hman a pawimawh. Chezia leh ṭawngkamah an fimkhur tur a ni. Ram tana roreltu an ni a, an hna leh chanvo an hriat chian a ngai a, tih àwm leh àwm lohte an hriat a ṭul. Tawnhriat la nei tam lo an nih pawhin ngawrh takin an inzir tur a ni.