Treasury bazar sawn chungchang

Treasury Square bazara thil zuar ṭhinte chu AMC ruahman angin AMC Multi-Complex, Tuikual South-ah an insawn dawn a, March 22, 2025 khan mi eng emaw zat chu an insawn lut ṭan.

Ruahman dan chuan, Treasury bazara thil zuar ṭhinte chu March 22 thleng khan kawngpui kam velah an inzawrh phal a ni a, chumi hnu lamah erawh chuan phal a ni tawh lo a, thil zuar turte chuan AMC Multi-Complex-ah an zawrh a ngai tawh dawn.

Treasury bazar ṭhin, tun hnaia kâng ta kha Aizawl khawpuia hmun pawimawh ber zinga mi a ni a, sorkar hmun pawimawh ber ber awmna lai báwra hmun tiṭawp thei thlai leh thil dangte zawrhna a awm tlat kha a inhmeh lo a, a mawi lo hle. Sorkar hmun pawimawh tak tak himna atan pawh thil ṭha a ni lo.

AMC lamin Treasury bazar ṭhin titawp tura hma a la hi a lawmawm a, AMC ruahman anga bazara thil zuar ṭhinte'n thuneitute thu awihah AMC Multi-Complex-a an insawn lut ṭan pawh a lawmawm tak zet. Harsatna siam loa an insuan lut hi an fakawm hle a ni.

AMC Multi-Complex-ah hian a tir lamah chuan a hma angin dawrtu an la tam tâwk lo thei a, an thil zawrhte an hralh tam nghal mai loin a rinawm. Hei hi thil nih dan tur àwm rêng pawh a ni. Hun a kal ang a, mipuiin an hre zau tial tial ang a, a la ziaawm chhoh ngei a beiseiawm.

Multi-Complex-ah hian harsatna dang neuh neuh pawh a la awm thei a; thil zawrhna tur hmunhma siam danah fuh lo tak takte pawh a awma sawi a ni. AMC hotute pawhin uluk lehzualin enfiah se, siam rem ngai leh hmunhma tihdanglama siamṭhat ngaite chu siam remsak thei se a duhawm.

Aizawl veng hrang hranga kawngpui kama inphote pawh a tahtawla khap a nih dawn thu AMC hotute chuan an tarlang. Kawngpui kama thil zawrh hi thianghlimna lam ngaihtuahin a fuh tawk lo a, kawngpuiah lirthei a tlan reng bawk avangin mihring himna atan pawh thil ṭha a ni lo. Mipui rilru sûkthlêk thlir chungin, mi náwlpui tana ṭha ber tur ngaihtuahin AMC hian hma la zel se, huaisen a ṭul hunah huaisen takin hma an lak a ṭul ang.