Hna thawh ṭan

Kum a thar a, sorkar pisa kal hun a ni leh tawh a, sumdawngte pawhin hna an thawk ṭan leh ang. Mizoram sorkar chuan January 3, 2020 aṭanga pisa kai ṭan tur a ti a, chutih laiin, pisa kai lo an la tam hle a, a kai chhunte pawh a hun taka thleng lo leh a hun hmaa pisa chhuahsan an tam hle.

Mizote hi hnam dang ang lo taka kum hlui thlah la na tak hnam kan niin a lang a; mi dangin kum thar an hmuah zante pawh 'Kum hlui thlah zan' ti zawnga sawi ṭhin, kum hlui thahna hla ṭha tak tak nei kan ni. Hei hi kan nunphung a nih avangin sawisel leh sawi hnawm chi a ni lo a, hetih lai hian kum a thar tawh hnua min uai rittua hman zui loh erawh a ṭha khawp mai.

Kum hluiah December thla chawhnu lamah chuan 'hunpui' kan hmuak a, kan inbuatsaih a, Krismas thawmhnaw leh hunpui atana mamawh zuartu sumdawng tih loh chuan chawlh boruak hi kan hmang hma ṭhin hle. Sorkar pisa tam takah thawktu an inthlahdul hma a, Krismas an urlawk avanga pisa dawr tur awm mumal lote pawh a awm ṭhin.

Tunah chuan kan lawm ber Krismas a liam a, kumthar lawmna hun bik pawh kan hmang zo leh ta a; chawlh boruaka inawi lungleng tawh loa hna thawk thei tura kan insan mar a hun ta hle.

Hunpui uar tak leh âm taka kan hman chu hunin a liampui tawh a, tunah chuan hma thar la tur leh bul ṭan thar turin hun ṭha a inhawng a. He kum lo tharah hian hna thawk ṭan nghal turin rilru i siam ang u.