Luiah fimkhur lehzual a ngai e

Khua a lum chho a, luia intihhlim hun lai a nih avangin luia kal an tam leh ta. Chutih rualin, tun hnaiah Tlawng lui leh lui dangah tla hlum an awm leh ta zauh zauh a; a pawi ṭhin hle a ni.

Hetih lai hian, YMA, Maubawk Branch chuan Tlawng luia thil eng eng emaw ti tura kal turte chu fimkhur turin mi tin an chah a, an ngen bawk. Maubawk YMA ngenna leh thuchah hi a pawimawh hle mai a; Tlawng luia kal turte an ngenna ni mah se, Mizoram chhung lui danga kal turte tan pawh a pawimawh tak zet a ni.

Khua a lum hi chuan luiah emaw, dilah emaw inchiah daih a châkawm ṭhin a, intihhlimna ni paha chhungkua leh ṭhianhoa luia kal pawh an tam ṭhin rêng a. Chutih ruala chanchin kan hriat fo chu lui tuia tla hlum a ni.

Luia kalte hi fimkhur turin an inchah ṭhin tlangpui chuan a rinawm a, chesuala tla hlum tate pawh an theih tawka fimkhur chunga vanduai tate pawh a ni mai thei. Chuvangin, luia chetsualna thlengte leh thihna hial a thleng ṭhinah hian indem chiam chiam chi a ni bik kher lo ang.

Khua a lum chho zel dawn a, luia kalte pawh kan uar chho zelin a rinawm. Kan fimkhur em em reng a ngai a, tui hleuh thiam lo phei chu fimkhur lehzual a ngai. A theih phei chuan vanduaina a thlen palha chet lak dan tur ruahman lawkna neih a, chhan chhuahna tur hmanrua inrin lâwk emawte a ṭhain a rinawm.

Luia tla tlum zingah pawl hminga blanket sûk hnatlanga vanduai tate pawh an lo awm tawh ṭhin. Hei vang hian pawl tam tak chuan luia blanket sûk an duh tawh lo a, mahni khua/veng chhungah an su mai ṭhin a, ṭhenkhat chuan insukna tur tuite pawh an lei ṭhin. Hetiang hi thil ṭha tak niin a lang a, la ti ve ngai lo, pawl hminga blanket su ṭhin site chuan tih ve atan a ṭha hle.

Upate chuan, 'Fimkhur nâk nâk chuan vanduainate pawh hi pumpelh theih a mual mual a awm' an lo ti ṭhin; a dik hmel viau. Vanduaina kan tih ṭhenkhat hi chu pumpelh theih a nih a rinawm a, luia kal ṭhinte pawh kan fimkhur lehzual a ngai e.