RTI ngaih pawimawh zual a ṭul

Mizoram Information Commission report thar ber 18th Annual Report-a a lan danin, kum 2023-24 financial year chhung khan sorkar department/office 170-in RTO Act tlawhchhanin ṭum 5,734 zawhna an dawng a, zawhna dawngtu department/office 170 zinga 139-in an chháng vek a, chutih laiin zawhna chhang vek lo eng emaw zat an awm a, department/office phei chuan zawhna an dawnte an chhan an nei lo hrim hrim tih tarlan a ni.

Department/office-te'n information dilna 5,734 an dawn zinga 5,378 chu chhan a ni a, chu chu 93.79% a ni. Zawhna 356 chu chhan a ni lo tihna a ni a, chu chu 6.21% a ni. Zawhna chhan aiin chhan loh hi tlem zawk hle mah se, 356 lai a la nih tho avangin chhàn loh hi a tam hle.

Department/office 170 zinga 139-in zawhna an dawnte an chhàn vek theih laiin, 31 chuan an chhang vek thei lo a, department/office panga phei chuan an chháng lo hrim hrim. Chu'ng department/office-te chuan an tih tur leh mawhphurhna an hlen lo tihna a ni a, a zialo hle.

RTI Act hmanga zawhna chhan dana lungawi loa thuneitu sang zawka zualko 144 a awm bawk a; hei pawh hi a tam viau mai. Sorkar department/office-te'n RTI Act hmanga zawhna ṭha taka an chhan hi chuan lungawi lohna tur a awm lo a, chhànnnaah mi an lungawi lo a, a chhángtu lamin an tih tur an ti tâwk lo tihna a ni thei.

RTI Act hmanga information dil hi online-in tih theih a ni tawh a, a lawmawm a; a awlsam tawh avangin zawhna lut pawh a tam phah hle tih a lang. Sorkar department/office-te an ṭan lehzual a ngai tihna a ni a, RTI hi phurritah ngai loin an tih tur, an mawhphurhna, an hnain a ken tel a ni tih an hriat chian hle a ngai.

RTI Act hi eirukna leh hlemhletna dona hmanraw ṭha tak a ni a, mipui pawhin hman ṭangkai lehzual zel tum ila. Chutih rualin, rilru thianghlim lo, sorkar tihmualpho tumna vang ngawr ngawra tih erawh a ṭha ber lo mai thei a, zawhna àwm ang lo lutuk leh a lo dawngsawngtu tana chhan harsa tak takte inzawh pawh thil awm thei a ni a, mipui lam pawh fimkhur a ṭha ang.

Sorkar department/office-te zingah RTI Act an la ngai pawimawh tawk lo tih a hriat theih a, an tih ngei tih an ngai pawimawh lo a, an mawhphurhna an hlen lo tihna a ni a; a zialo hle. RTI Act an ngai pawimawh tur a ni a, information dilna an dawnte an chhàn ngei hi an tih tur, an hnain a ken tel a ni tih hre thar leh mawlh teh se.