AMC lehkha leh an chhanna

Tun hnaia Treasury Square bazar kâng chhe taah bazar din keh chungchanga thuneitu Aizawl Municipal Corporation-in an remti lo chungin March 25, 2025 khan thil zuar ṭhinte ṭhutna tur (thil zawrhna tur) siam hnatlang neih a ni. Hei vang hian AMC chuan Venghlui Local Council hnenah March 25 khan lehkha thawnin, bazara hman leh tuma hmalakna chu titawp tur leh hma an lak loh chuan LC ṭhiah thlenga hmalak theih a nih thu an hriattir a; Venghlui LC lam pawhin March 26 khan chhangin, hmalakna tihtawp an tum thu an hrilh a ni.

Venghlui LC chuan, Treasury Square bazar kâng ta hmuna bazar siam leh tuma hmalakna awm chu pawi an tih thu te, an tih theih piah lam a nih thu leh an dan theih loh thute an ziak. Venghlui LC hian pawi an ti tak tak turah ngai ila; hetiang ngaihtuahna an nei hi a lawmawm.

Venghlui LC vêk hian LC leh NGO hruaitute hmaah Aizawl (AMC) Mayor-in AR-in an chhuahsan tâk ram a sihhmuh niin an tarlang a; chu chu tihpuitlin beiseiin hmalak zui tawh loh an remti ta niin an tarlang bawk.

Venghlui LC-in AR chhuahsan ram Aizawl Mayor-in a sihhmuh anga an sawi hi ngaihtuah tham tak a ni a, ngaihven zui a ngai ang. A lo sihhmuh tak tak ni ta se, ani lo sihhmuh theih a ni chiah em? A thuneihna leh AR hmun chhuahsan taka tute emaw hmun pe theitu a ni reng em? Ngaihven zui ngai tak a ni.

Mayor hian sihhmuh si loin Venghlui LC lam hian 'advantage' lak tum rànin sihhmuh angin an sawi mai zawk pawh a ni thei a; chutiang a nih chuan mi thil sawi loh tawp sawi anga inchhuahna a ni a, thil ṭha lo tak a ni bawk ang.

Aizawl khawpui lailia AR awmna ṭhin, an chhuahsan tak hi mimal, pawl, kohhran leh tute emaw hamṭhatna bik atan pek loh hi Mizoram mipui duh dan niin a lang. Hei hi thuneitute'n an hriat chian a, AR chhuahsan ram hman dan leh enkawl danah fimkhur hle a ngai. A ti theitute'n chawhmeh leh thil dang ṭhenkhat zawrhna hmun atan hman tum ta se, Mizoram mipui hian an duh lo hlein a rinawm.

AR chhuansan ram venhim leh hman zui ṭan tur hi mipuiin an ngaihven em em a, sorkar a fimkhur hle a ngai ang. NGO Coordination Committee pawhin an ngaihven hle a, duh dan leh duh lohte pawh an tarlang tawh. Sorkar pawh a fimkhur thawkhat niin a lang a, ram hman zui dan tur ngaihtuahtu tur, sorkar hotute leh tlawmngai pawlte leh political party hrang hrangte telna committee din a nih tur thu Chief Minister-in a sawi tawh.

Engpawhnise, AR chhuahsan ram hman dan turah hian fimkhur taka hmalak a ngai a ni tih hi thuneitute'n theihnghilh loa an vawn reng a ngai a, tute emaw tihlawm nan an hmang tur a ni lo.