Tih dan ṭha lo tih ve loh

Chief Minister chuan March 27, 2025-a MLA lo ni tawhte pawl, Former Legislators Association Mizoram inkhawpui a hmanpuinaah, MLA lo ni tawh ṭhinte mawi leh zahawm taka Assembly House-ah an lo chet tawh ṭhin avangin MLA ni laite nungchang pawh a mawi zui phah niin a sawi. State danga an tih ṭhin dan ṭha lote ti ve zel loh leh, Kristian nih anga mawi leh mawi lote thliar thiam a ṭul thu a sawi bawk.

CM sawi hi mi tam tak chuan an pawmpuiin a rinawm a, pawm chiah lo pawh an awm ang. Tun thleng hi chuan India ramah chuan Parliament leh state dang Assembly-a member-te chet dan leh rorel tihtawp ngai hiala harsatna siam a nih ṭhin dan ngaihtuahin, Mizoram Assembly House-a member-te chet dan hi chu a la mawi viauah ngaih theih a ni; han inhnial deuh laih laihte chu awm ve fo ṭhin mah se.

Mizoram Assembly House-a member-te chet dan a mawi thawkhat a, chutih rualin, mawi vak lote pawh a awm ve ṭhin bawk. Tun hma aṭanga tun thlengin Mizoram Assembly House-ah hian party hrangte inhnial bap bap cháng awm ṭhin mah se, hmun dang ṭhenkhat anga awmze nei loa inhnial bur bur te, rorel inkhawm kal lai tihtawp hial ngai khawpa chetna ang chite a awm ve meuh lo a; a lawmawm tak zet. Kristiannain a nghawng chhuah ṭha tak leh Mizo nun se mawi an lantir vangte a nih a rinawm. Hetianga House-a mawi tak leh zahawm taka chet hi chhunzawm zel ni se.

CM-in hnam dang tih dan ṭha lote tih ve zel loh a ṭhat thu leh, Kristian tih atana mawi leh mawi lo thliar thiam a ṭul thu a sawi hi a pawimawh hle mai a; a bik takin minister te, MLA te, political party-te leh pawl dang ṭhenkhatte'n an ngaihtuah zui a ṭha hle ang.

Ram rorelnaah hian inhnial loh tawp chu thil theih a ni kher lo ang; inhnial hian thil ṭha a thlen cháng pawh a awm ang. Mahse, inhnial bur bur ringawt te, mawi lo taka chette hian thil ṭha a thlen meuh lo; a àwm tâwk chin a awm. Chuvangin, Mizoram Assembly-ah hi chuan member-te mawi tak leh hawihháwm takin che zel rawh se.

India ramah kan awm a, Parliament leh state dang, lian leh hlun zawktea thil tih dan entawna Mizorama tih ve a ni fo. India rama mi dangte tih dan entawn hi thil ṭhaah chuan a ṭha ngei mai a, mahse, an tih dan zawng zawng lo tih ve zel erawh a ṭha hauh lo.

India ram hmun danga politics khelh dan ṭha lo te, sorkar, political party, pawl leh mimal tih dan ṭha lote hi chu Mizoramah tih ve loh ngam a ngai a, lak luh loh a ṭha. Tu emaw lim/thlalak hâlte phei hi chu hnam dangin an lo ti a nih pawhin, Mizoramah chuan tih ve loh a ṭha; Pathian ringtu kan nihna leh Zo nun ze mawi nena inmil lo tawp thil a ni. Ngaihtuah chian leh fimkhur a ṭha e.