MUHCS huaisen takin kalpui se

Mizoram sorkar chuan April 1, 2025 aṭangin healthcare scheme thar - Mizoram Universal Healthcare Scheme (MUHCS) a kalpui dawn.

MUHCS hian sorkar hnathawkte pawh huam tura tih a ni a; mahse, Mizoram sorkar hnathawk pawl hrang hrang intêl khawmna - Federation of Mizoram Government Employees & Workers (FMGEW) chuan anmahni huamtir ve rih lo turin Chief Minister an ngen. MUHCS huamtir an duh loh chhan chu a kalphungah kimchang lo leh felhlel a la tam deuh vang niin an tarlang.

MUHCS hi mi tin huamtir tum a ni a, sorkar hnathawk lote chuan damdawi-ina awmna tur an duh dan azirin Rs 2,500 emaw, Rs 5,000 emaw, Rs 10,000 emaw kum khat atan an pek a ngai a, kum khat chhungin Rs 5,00,000 man thleng a thlawnin damdawi-inah an awm thei dawn.

Sorkar hnathawkte leh sorkar hnathawk pension tawhte erawh chu an hlawh (basic pay) azirin an hlawh aṭanga thawh (cut) tur a ni thung a; a tlem berah thla khatah Rs 200 leh a tam berah Rs 1,500 thawh tur niin, inenkawl atana sum senso zatah bituk a awm lo.

Damdawia inenkawlna senso Mizoram sorkarin a tumsak hi a lawmawm em em a, April 1, 2025-a kalpui ṭan tur MUHCS phei hi chu healthcare scheme hmasate aiin a ṭha zawk mahin a lang.

Mizoram sorkarin a (sorkar) hnathawkte a duhsak dan hi mi tam tak thîk tham niin a ngaih theih a, sorkar hnathawk ve lo mi tam tak chuan an ngaimawh hial mai thei. Sorkar hnathawkte chuan sorkar aṭanga hlawh ṭha tak an neih bakah, hun rei tak chu pawisa thawh ve loin, a zat bithliah awm loin medical reimbursement an ti thei tawh ṭhin.

Chutih laiin, khua leh tui ve tho, sorkar hnathawk lote erawh chuan pawisa an thawh a, kum khatah cheng nuai 1/2 emaw thleng chauh senso an hmu lêt thei ṭhin thung.

FMGEW hian MUHCS kalphung (system)-ah fel tâwk loa hriat an nei a nih pawhin, anmahni huamtir ve lo tura hma la nghal mai loin, zawm ve phawt se; kalphung siam rem ngai a awm a nih pawhin, siam rem zel theih a nih a rinawm.

Mizoram mi, sorkar hna thawk leh thawkte hi khua leh tui vek an ni a; MUHCS-ah sorkar hnathawk lote'n pawisa an thawh ang bawka sorkar hnathawkte pawisa thawh ve tura sorkarin a ruahman hi thil tih àwm tak a ni. Sorkarin MUHCS kalphung ṭha tak a siam hi huaisen tak leh chak takin kalpui rawh se.