Ruihhlo do ràlthlìr bik lo ila

Central YMA-in March 22, 2025-a 'Ruihhlo do hnatlang' neia branch tinte hma la tura a hriattir angin Kulikawn Vengthlang Branch pawhin an huam chhungah hnatlang an nei a, damdawi (ruihhlo) zuar pakhat chu a ruihhlo zawrh nen an man.

Ruihhlo an man theihna tura puitu leh hêktua puh Kulikawn Vengthlang YMA member pakhat chu a March 23 chawhma dar 11 velah hmai tuam rualin an in aṭanga ko chhuakin, kut an thlak rawn a ni. He thil hi tum lawk leh ruahmanna fel tak nena thil tih niin a lang a; police station-ah FIR thehluh zui a ni.

Thil thleng hi police-in chhui zui nghalin, kut thlaktua ngaihte an man kim tawh a, tlangval panga an ni. Ruihhlo donaa hmalaknaah kut tuar an awm hi a pawi hle mai a, a mak bawk. Mizoram, Kristian ram a nihna nen a inhmeh lo tak zet a, Mizoram hma lam hun zel tur ngaihtuahin, ngaih tiṭha lo thei hial thil a ni. Police-te'n chak taka hma la a, rang taka an chhui chhuaka an man erawh a lawmawm.

Ruihhlo tawlh ru ṭhinte hi an huaisar sâwt hle mai. Khawthlang lam ram ṭhenkhatah ruihhlo tawlh ṭhin pawlte an chak hle a, sorkar pawhin tihngaihna a hre vak lo a, hmun ṭhenkhatah phei chuan an ngam loa sawi a ni ṭhin. Chutiang chu hriain Mizorama ruihhlo tawlh ṭhinte pawh hian rilru an nei ṭan hial pawh a ni tawh mai thei.

Kan ram hi ruihhlo tawlh ṭhinte leh ti ṭhinte zalenna leh an duh duha an chêt theihna ramah a chan kan phal tur a ni lo. Ruihhlo tawlh ru ṭhinte an tawmim theih nan leh huaisar taka an chêt ngam loh nan ṭan lak tlan a ṭul. Sorkar, kohhran, pawl hrang hrang leh mipui hian ruihhlo donaah theihtawp an chhuah tlân a ngai tawh tak zet; a bik takin sorkar hian inpekna thûk tak nen thapui a thawh a ngai.

Ruihhlo tawlh rûk tihtawp hi thil harsa tak a nih a rinawm a, chumi avanga beidawnsan chi erawh a ni lo. Ruihhlo tihrêm emaw, ruihhlo tawlh tihtawp hmak emaw a theih loh pawhin, ruihhlo a tlem theihna tur te, ruihhlo tawlh ṭhinte leh ti ṭhinte an zalen loh nan theihtawp chhuah tlan a ṭul tak meuh.

Ruihhlo do hi lo ràlthlìr bik chi a ni tawh lo, mi tinin kan theihna lai apiangah ṭan kan lo lak ve a ṭul ta; hei hi ruihhlo laka kan ram kan chhanhim theihna tur leh kan ram a ralmuan zelna tura tihmakmawh a ni e.