Khawpuiah faina nunpui a ṭul

UDPA department, AMC leh Central YMA bultumin March 31, 2025 khan Aizawla veng hrang hrangah faina hnatlangpui neih a ni a, kum khat awh tur YMA branch-te faina lama inelna tur hawn nghal a ni.

Faina Hnatlangpui hawnnaah hian UDPA Minister chuan Tuiriala Common Bio Medical Waste Treatment Facility chu April 1, 2025-ah hman ṭan a nih dawn thu a sawi. Damdawi-in bawlhhlawh bik paihna leh sâwngbàwlna hmun thar hi a nih tur ang taka kalpui a nih theih nan mawhphurtute'n ṭha taka an enkawl zui a ṭul ang.

Mizorama thingtlang khuate hi an fai tlangpui tawh a, khawlai ṭawp tak leh bawlhhlawh hmuh tur a awm meuh tawh lo; Mizoram khawpui ber Aizawl a la ṭawp viau thung. Khawpui faina leh thianghlimna tura hmalaknate'n awmzia nei ve tial tial mah se, mipui hian faina kan la nunpui tak tak lo niin a lang a; ṭan lâk a la ngai hle.

Aizawl khawpui a faia a thianghlim lehzual theihna tura YMA branch tinte inelna buatsaih ṭan a ni hi a lawmawm a, awmzia a neih ngei beisei ila. Inelna bul tumtu leh hma latute an fakawm.

Veng fai inelna hi YMA anga hmalakna a ni dawn a, veng tinah YMA a awm a, YMA branch tinin hma an lak chuan rah ṭha tak a chhuah ngei ngei a beiseiawm. Kum khat vel awh inelna a ni dawn a, hun bik neia fai ni loin, kum tluana fai a ṭul dawn.

Veng fai inelna hi hun awh rei deuh tur a nih avangin kum dang zelah pawh nghawng ṭha a neih theih a rinawm a, veng tinah mipui náwlpuiin faina an nunpui theih phah a beiseiawm. YMA branch tinte'n an huam chhung ṭheuhah theihtawp chhuahin, veng fai ber nih tum ṭheuh se.

Faina leh thianghlimna chungchangah sorkar, AMC leh mi ṭhenkhatte'n theihtawpin hma la tawh ṭhin mah se, mipui thinlungah faina leh thianghlimna a intih ngheh loh a, mi náwlpuiin an ngaih pawimawh tak tak loh chuan faina tak tak a thleng thei lo. Mipui náwlpui hian faina leh thianghlimna a taka kan nunpui a ṭul a, kan nunah kan lâk luh a ṭul a ni.