Sorkar thawhpui damdawi-in

Mizoram sorkar chuan April 1, 2025-a hman ṭan tura a tih Mizoram State Universal Healthcare Scheme chu a kalpui ṭan ta niin a lang a; ṭha tak leh tluang taka kalpui a nih theih nan leh mipuiin an chhawr ṭangkai ngei theih nan sorkarin theihtawp a chhuah bakah, mipui lamin an tih turte ṭha taka an tih a ngaiin a rinawm.

Health department chuan March 31, 2025 kan MUHCS hnuaia mimal/kohhran damdawi-in thawhpui tur (empenalled hospital) 26 list a tichhuak a; Mizoram chhunga damdawi-in paruk leh state pawna damdawi-in 20 a ni.

Mizorama MUHCS hnuaia empanelled hospital ni mek parukte hi tuna a lan danah chuan private hospital zinga a lûn ber ber an ni lo mai thei a; mipui pan tam ber ber an nih loh chhan erawh hriat mai a harsa ang.

Tun dinhmuna Mizoram, a bikin Aizawla private hospital lûn ber ber, miin an pan tam ber berte hi chu pawl thu angin MUHCS hnuaiah an la lut lo deuh vek a; luh harsa an tih chhan pawh mipuiin kan hre tlangpui tawh àwm e.

Mipuiin private hospital ṭha ber bera an ngaih mekte hi damlote'n an pan nasatte an nih si avangin MUHCS-ah lut thei se a duhawm hle mai. Chumi tur chuan private hospital pawlte leh Mizoram sorkar hian mipuia harsatna thleng thei zawng zawng thlir chungin, ngunthlûk lehzualin ngaihtuah leh se, a ṭul angin indawr zel se la, a khawi lam ve ve pawh inpawt fân leh deuh thei se a ṭha hle ang.

Mizoram sorkarin March 31, 2025-a hriattirna a tihchhuahah state pawna empanelled hospital-te chu 20 an ni a; a hmaa empanelled hospital zat chu 40 vel (40 tling lo hret emaw) a ni a, empanelled tharah a zatve dáwnin a tlem zawk.

State pawna damdawi-in zingah hun rei tawh tak aṭanga Mizoram sorkar empanelled hospital lo ni tawh, tuna empanelled thara tel ta lo zingah India ram pum huap pawha damdawi-in ṭha zinga mi, Mizote pawhin kan pan nasat tak tak an tel nual. Mizote'n kan pan tam lêm loh damdawi-in an tel nual mai thei bawk.

Mizoram pawna damdawi-in, Mizote'n kan pan nasat em em ṭhin empanelled hospital ni ve ta lote hi a chhan hriat mai a harsa a, cashless an tih theih loh vang a ni nge ni lo hriat a ni lo.

Mizo damlote tana ṭangkai zual damdawi-in ṭhate hi Mizoram sorkar hian a thawhpui leh thei se, damlote tan huang han zauh leh hret thei se mipui tan a ṭha hle ang le.