Fûr atana inpuahchah a hun

Lunglei District Disaster Management Authority chu tun hnai khan an ṭhukhawm a, kumina fûr thleng turah chhiatna hrang hrang thleng thei laka himna tur leh chumi atana inpuahchah dan turte an rêl a, hmalakna tur thil chi hrang hrang an ruahman.

Mizote hian inbuatsaih lâwk hi kan thiam loh záwng tak a ni mai thei a, inbuatsaih lâwkna ṭha leh mumal tak nei loa thil lo thleng ang ang hmachhawn mai zel niin a ngaih theih. Chutih rualin, inhmakhua kawngah hma erawh kan sawn tial tialin a lang.

Lunglei DDMA-in fûr lo thleng turah tun aṭanga inbuatsaih lâwk dan tur an ngaihtuah ṭan hi a lawmawm a, an ti ṭha hle mai. Theihtawpin inhmakhua se, an inbuatsaih lâwkna chuan awmzia a neih ngei ang. District danga DDMA-te pawh tun aṭanga hma la ṭanin inhmakhua thei se a duhawm.

Aizawl hi khawpui ber a ni bawk a, district khawpui dang zawng zawng lakah pawh a lian fál. In a tam a, a bit bawk a; hmun âwih tak tak leh khâm panga in sak pawh a tam. Khua a len tham avangin bawlhhlawh thehthang danah pawh fel lo a tam ber awm e.

Hengte avang hian hun rei tak ruah a sûr loh hnua ruah tam tham deuh sûr hi Aizawl khawpui hian a zo meuh lo ṭhin a; bawlhhlawh paih dan dik loa paih a la tamzia a rawn lang chhuak ṭhin. A zialo ṭhin a, a mualphothlak tel bawk.

Tun hnaiah Aizawla veng ṭhenkhat chu fûr thleng leh tur atan an inbuatsaih ṭan a, an veng chhunga luikawrte an tifai a, bawlhhlawhin kawr a hnawhte an tifai ṭhin. Hetianga hmalakna hi a ṭha hle mai a, luikawr felfai lo vanga harsatna leh chhiatna thleng thei tam tak chu an veng ngeiin a rinawm. Veng dangte pawhin tih vek ni se a ṭha hle ang.

Ṭhál vanglai a ni mek a, hun rei tak ruah a sûr tawh lo. Khua a ṭhat vang vang avang hian leilunga chhiatna thleng thei chungchangah inthlahdah phah lo ila. Nakkin lawkah fûr a ni leh mai dawn a, fûrpui a thlen hunah chhiatna lian tham a thlen loh nan tun aṭanga inbuatsaih lâwk a ṭul.

Kan ram leilungin a zir tâwk lo a, chhiatna thleng thei ven vek a harsa mai thei. Chhiatna a thlen pawha a nasat lutuk loh nan leh chhanchhuah hna thawh dan turah tun aṭangin sorkar, khawtlang leh chhungkaw tin inbuatsaih lâwk a ṭul bawk.