Chak zawkin sawhthing lei ni se

Sorkar flagship programme, Bána Kaih hnuaiah Aizawl district-a secondary collection centre kaltlangin sawhthing quintal 2,761.74 lei a ni tawh a, lei tur quintal 26,759 a la awma ngaih a ni.

Tuna sorkarna chelh mektu party-in inthlan hmaa an lo intiam tawh angin sorkarin Mizoram hmun hrang hrangah sawhthing an lei mek. Sawhthing hi February 20, 2025-ah lei ṭan a ni a, Pathianni tiam loin ni 40 dáwn sawhthing lei an buaipui tawh tihna a ni. Engtik thleng nge buaipui a nih dawn tih sawi lâwk theih a ni lo.

Aizawl District Agricultural Marketing Committee-in April 3, 2025-a an tarlan danin, ni 40 dáwn chhungin Aizawl district-ah quintal 2,761.74 lei a ni tawh a, lei tur qtl. 26,759 vel la awm tura ngaih a ni. Lei tawh leh la lei loh, Aizawl district-a sawhthing thar zawng zawng chu qtl. 29,520 vel tihna a ni.

Aizawl district-ah sawhthing qtl. 29,520 thar a nih chuan, sorkarin a lei tawh qtl. 2,761.74 chu 9.35% chauh a ni a, sawhthing thar zinga 90.65% chu lei hmabak a la awm tihna a ni.

Thla khat chuang daih chhunga sorkarin Aizawl district-a sawhthing a lei tawh zat hi a la tlem hle a, district dangah pawh lei tawh aiin la lei loh a tam fê zawka sawi a ni. Sawhthing hi tun aia chak zawkin lei a ṭul tih a lang. Tlang ram loneih dan kalphung, lo hâl hnua hna chi hrang hrang indawh chhoh dante hre reng chungin sorkar hian theihtawp chhuah zel rawh se.

Sawhthing hralh leh lei chungchangah hian opposition party-te'n thâwm an lo nei ve reng bawk. Eptu pawlte'n sorkar an lo nawr ve reng hi a ṭha a, ṭhenkhat erawh chu politics-a inbeihna liau liau, kut hnathawtute ṭhatna tur duh tak tak vang a ni loin a lang.

Eptute hian rilru thianghlim tak púin, kut hnathawktute hmangaihna nen dik taka sorkarin sawhthing lei a kalpui theih nan nawr zel se. Sorkar pawhin sawhthing lei chungchanga opposition party-te thu leh hla hi inenfiah nan te, dik leh chak taka kal phah nan sorkar hian hmang thiam se. Opposition-te thu leh hla zawng zawng erawh zawm chi a ni lo a, tam tak chu ménah thlâk a ṭul ang.

Pawimawh ber chu - eptu party-te'n sawi an nei emaw, nei lo emaw, sorkar hian an intiam ang takin kut hnathawktute thar hi an lei vek tur a ni a; muangchang loin, a chak thei ang berin sawhthing lei hi bawhzui ni rawh se.