Lungleia tui harsatna thleng hi

Lungleia PHE Department hotute April 4, 2025-a press mite an kawmnaah, kumin ṭhál mekah Lunglei khawpui châwmna atana tui lakna Tlawng lui tui chu kum dang aia a kang nasat thu te, ruah a sûr mai loh phei chuan a manganthlak hle dawn thute an sawi.

Hetianga PHE Department hotute'n Lungleia tui harsatzia press mite hmaa an puang ta hial hian an dinhmun a khirhzia a tichiang a; tun dinhmunah chuan theihtawp chhuah mah se, tui pump tur a awm miau loh chuan han tih theih vak an nei bik lo a ni tih mipuiin hriatpui se an duh niin a lang.

PHE Department hotute sawi danin, kuminah kum dang aiin tui a kang a nasa. Tui pump turin thil dang zawngah harsatna nei lo mah se, tui pump tur ber a awm miau loh avangin tihngaihna an hre bik lo tih a lang. Tun dinhmunah chuan PHE Department-in tih theih an nei bik lo a, mihring tih theih piah lam a ni rih a, chuvang chuan dem ngawt chi an ni lo.

Tunlaia ṭhál vaekchâr thleng mekah Lunglei khawpuia tui harsatzia sawi a nasa a, Lunglei mipui an khawngaihthlak hle. Lungleia tui harsatna hi a chhan zawng ta ila, sawi tur tam tak a awm thei ang a, puh tur pawh tam tak a awm ang.

Tuia harsatna hi khuarel thil a ni thei a; chu khuarel thil chu mihring thil tih vanga awm a ni thei bawk. Lunglei bikah hian tui lakna lui dung leh lui hnâr lama thing leh mau chereu nasat sâwtzia hmuh theihin a awm a, kum 10/20 lek kal ta leh tun dinhmun chu inthlau tak a ni. Thing leh mau chereu nasa hi mihring kut hnathawh a ni zel.

Mithiamte'n lui dunga thing leh mau a chereu nasat chuan tuihna a tlem ṭhin an ti. Lunglei khawpui chawmtu tui lakna lui pawh a kam leh a hnâr vel a chereu nasat miau chuan tuihna a tlem phah ngei ang tih a chiang.

Lunglei châwmtu tui pump-na hmun leh a lui hrim hrim hi a tê deuh a, mihring pung zelah tui a tam tâwk tawh lo a ni thei. Hma lam hun thui tak thlirin, Lunglei bul hnaia lui lian zawka tui pump theih dan tur ngaihtuah a hun niin a lang. Sorkara thuneitute'n khawpui ṭhang zel leh mihring pung zel tur thlirin ngaihtuahna thar an sên a, chak zawka hma an lak a ṭul ang.

Kum dang zelah pawh khél loin ṭhál a la awm zel dawn, khuarel, sik leh sa hunbi kal dan pangngai a ni. Ṭhál hi kum lo la kal leh zel turah pawh a la na tial tial dawn pawh a ni mai thei. Lunglei mai ni lo, khawpui ber Aizawl leh khaw dangte pawh tun ang zela kan awm chuan tuiah harsatna nasa zawk tâwk thei kan ni tih hria a, thing leh mau leh tuihna humhalhah rilru kan siam thar a ngai tak zet a ni.