Vaihlo zûk leh hmuam sim

Vaihlo zûk leh hmuam chungchang khawvel pum dinhmun zirchianna, Global Adult Tobacco Survey (GATS-3) chu Mizoramah neih a ni leh dawn a, May 2025-ah ṭan beisei niin, kumin chhunga neih tum a ni.

GATS-3 neih a nih dawn avang hian National Tobacco Control Programme (NTPC), Mizoram hotute chuan vaihlo chungchangah Mizoramin hma a sawn theihna atan zûk leh hmuam ti zat a tlakhniam theih nan theihtawp chhuah turin mipui an ngen.

Khawvelah GATS ṭum hnih neih a ni tawh a; GATS-1 ah Mizoram chu mihring cheng zat aṭanga chhûta vaihlo zûk leh hmuam ti tamna ber a nih laiin, GATS-2 ah chuan pahnihna a ni tawh. Mizoramah vaihlo ti zat a tlahniam leh GATS-1 aṭanga GATS-2 ah hmasawnna hmuh tur a awm hi a lawmawm a; GATS-3 ah pawh GATS-2 aia hmasawnna a awm leh theih ni se a duhawm.

GATS-2 aṭanga GATS-3 ah Mizoram dinhmunin hma a sawn theih nan NTPC chuan vaihlo zûk leh hmuam la ti mekte chu sim tum turin a ngen. NTPC ngenna hi thil àwm tak a ni a, thil ṭha tak a ni bawk. Mizoram mipuite'n a pawimawhna leh a ṭhatna hriain, GATS-3 ah result ṭha lehzual nei turin kan ṭan tlan a ngai.

Vaihlo zûk leh hmuam hi mihring hriselna atana ṭha lo, cancer leh natna dang dang thlentu, taksa tichhe thei a ni tih hi thil chiang a ni. Vaihlo tih nasat vanga cancer hluar berna state nih hi thil zahthlak a ni bawk.

Mihring hriselna tichhetu, natna thlentu, thihna thlentu vaihlo tih hi a ti ṭhinte'n kan sim a ṭul a; zûk leh hmuam donaah theihtawp chhuaha ṭan tlan zel a ngai e.