Mizoram People Forum

Mizoram People Forum (MPF) chuan tun hnai khan Annual General Meeting an hmang a, Mizoram hmun hrang hrang aṭanga palai kal khawmte'n 'sorkar inrelbawlna ṭha' tih thupui an zirho.

MPF hian Mizoram siamṭhat hna ṭhahnemngai takin an thawk ṭhin a, a bikin inthlanna dik leh thianghlim a awm theihna turin an thawhhlawk hle. Politics lam ngaih-ven deuhte chuan MPF awm hma leh awm hnu hi hmuh theihin inthlan dawnah a danglam niin an sawi ṭhin a, Mizoram pumah MPF hi din theih ni se a ṭha hle.

MPF hi kohhran hrang hrang leh tlawmngai pawlte kal khawm an nih vangin politics-a awn lam nei lo tura ngaih an ni a, ram tana ṭhahnemngai taka thawk tura beisei an ni. MPF-a hnathawk ṭhin (worker) ṭhenkhat hian mimalin politics-a awn lam an lo nei hret a nih pawhin a pawl hi chu tun thleng chuan ngil takin a la kal niin a lang a, a hnathawh hi Mizoram tan a ṭha takzet a ni.

Hetihlai hian MPF hian tlin lohna leh tih fuh tawk loh pawh tam tak a nei ve bawk ang a, a hnathawktu lamin duhthu an sam loh avanga sawisel an kaina khua leh vengte pawh a awm thei. Heti chung hian MPF avangin Mizorama inthlanna hrang hrangte a thianghlim sawt a, duhthusam la ni lo mah se tun hma nena khaikhin ralah chuan inthlanna a felfai tawh a, tunah pawh MPF awmna leh awm lohna hmuna thil kal dan chu a inang lo hle a ni.

Mizo mipuite hian MPF tichak turin thlawp tlat se, poli-tical party lam pawh MPF thu leh hla ngaichang chungin kal zel se, Mizoram tana hna ṭha thawk turin dik leh huaisen takin MPF hi kal zel rawh se.