Traffic Jam Free Aizawl

Home minister chuan tun hnai khan Aizawl khawpuia lirtheite tluang taka an kal theihna tura ruahmanna siam thar, Traffic Jam Free Aizawl City Programme chu a hawng. Mizoram sorkar chuan kum 3/4 chhungin Aizawl chu traffic jam awm lohna khawpuiah siam a tum a; Aizawla lirthei nei zawng zawngte chu ni 426 chhungin garage nei vek tura tih an ni dawn a, kawngpui ṭha lo lai siamṭhain, bus leh taxi tlan dante pawh siamṭhat a ni ang a, mimal leh sorkar lirtheite pawh number tawpa 0-9 inkar chu thla khata vawi thum zel ding tura ruahmanna siam a ni ang.

Aizawl khawpui harsatna lian ber zinga mi pakhat chu traffic jam nasa lutuk hi a ni. Hei hian mipui hun leh sum tam tak a khawhral a, hna tam tak ṭhulh phah a nih bakah khawsak a tibuai thui tawh hle. Traffic jam sut kian dan tur hi ruahmanna hrang hrang siam a ni a, Traffic Police lamin theihtawp an chhuah bawk a; nimahsela tun thleng hian Aizawl khawpuia lirthei veivak hi a la buai hle.

Damna tur a nih chuan damdawi kha deuh pawh inchawh a ngai ṭhin ang hian, Aizawl khawpui traffic jam tiziaawm tur chuan ruahmanna thar, mipui nghawng deuh dawt khawp siam a ṭul tawh niin a lang. Ram dangah leh khawpui dangah pawh traffic jam avanga harsatna su kiang tur hian thil chi hrang hrang an lo ti chhin tawh a, mipui nawlpui tana ṭha tur a nih chuan tute mah dim bik loa kal hi a hun tawh hle a ni.

Tunah chuan dan angin lirtheite garage chhunga dah vek tura tih a ni tawh dawn a, he thupek awm sa hi a taka kenkawh a ni tawh dawnin a lang a, a lawmawm hle. Hei bakah hian Vanglaini lam pawhin vawi duai lo an rawt tawh ṭhin lirtheite number tawpna 0-9 te an number a thlen ni apianga indin chhawk hi traffic jam tihziaawmna ṭha tak a nih theih hmel a, kalpui a ni tur hi a lawmawm khawp mai.

Sorkarin huaisen taka Traffic Jam Free Aizawl City Programme a duang ngam hi a fakawm a, hei hi a kal tlangpui thei a nih chuan Aizawl khawpui harsatna lian ber pakhat chinfel a ni dawn tihna a ni a, a nghahhlelhawm tawh hle.