Mizoram leh faina

India hnampa, Mahatma Gandhi pian champha aṭanga hman ṭhin Faina Hapta pawh Mizoram hmun hrang hrangah hman ṭan a ni.

Mizoramah leh India ram hmun dangah faina hapta hi hman ṭhin a ni a, hemi hun chhung hian faina kawnga inzirtirna uar taka kalpui a nih bakah a taka hna thawh ṭhin a ni. Mizoramah pawh hun rei tak chhung chu he faina hapta hi hman ṭhin a ni a, tun hma zawng aiin tun hnaiah hian an titak zawkin hna pawh an thawk ṭha tawh niin a lang.

Faina chung-changah Mizoramin zawi zawiin hma a sawn chho mek a, tun hma nena khaikhin ralah chuan Mizoram pawh a fai tawh a, Mizote pawh hi kan fai tawh hle. Khawpuiah chang ni loin thingtlangah pawh fai ngaihpawimawh nachang kan hre ṭan a, kan bawlhhlawh paih dan leh kan in leh lo enkawl dan thlengin hma kan sawn ta a, a lawmawm takzet a ni.

Khaw ṭhenkhat chu 'khaw fai' tia sawi theih tur khawpin an awm tawh a, an khua leh faina chu inzawm tlat anga ngaih a ni a, hetianga neih belh theih tur khua hi tun-ah chuan ṭhahnem tak a awm ta. Fai tura inzirtirna hi uar taka kalpui zel ni se, tihtakzeta kan beih chuan fai hi kan tlin a ni tih hi kan inhrilh tam a pawimawh khawp mai.

India ramin faina lamah ṭan a la nasa a, chumi atan chuan sum pawh ṭhahnem tak dah a ni. India hi ram bal leh ṭawpa sawi a ni a, he ramchhung-ah bik hi chuan fai ber nih hi thil theih loh niin a lang lo. Hei vang hian India rama fai ber nih tumin kan ram hruaitute hian ṭan la ngam tak tak se, sum leh tha pawh sengin India rama fai ber nih hi tum ila, India rama state fai ber nih hi Mizoram hian a tlin thei ngei ang - tih tak takna nen kan tum ngam erawh a ngai.