Ṭhalaite'n thisen pek uar zel ila

Financial year 2024-25 chhung khan Mizoramah thisen unit 34,752 pek niin, chung zinga 93.71% chu pek bik nei loa a thlâwna pek (voluntary donation) a ni a, thisen pek lam buaipuitu Association for Voluntary Blood Donation-in voluntary donation target an siam 92% chu khûm a ni.

Mizoramah blood centre (blood bank) 11 a awm a, chungte chuan kum 2024-25 chhung khan blood donation camp vawi 611 an nei a, chu'ngah chuan thisen unit 22,602 pek a ni. Donation camp buatsaihah kan ti ṭha thawkhat a tih theih ang. Mizorama blood centre 11 zinga 10 chuan voluntary donation 90% chung lam an nei a, blood bank ṭhenkhat 100% tling thuakte an awm.

Voluntary blood donation-a Mizoram dinhmun hi India rama state leh union territory zingah a ṭha ber pawl a nih a rinawm. Hriselna lam dinhmuna record ṭha lo tak tak kan neih karah hetianga thil ṭha lama record ṭha tak kan nei hi a lawmawm tak zet a, Mizo kan nihna leh kan Kristianna nen pawh a inhmeh hle.

Thisen peka record ṭha tak kan neih hi Mizoram mipui, a bikin ṭhalaite vang a ni. Blood bank lamin theihtawp chhuah mah se, thisen petu tur an awm loh chuan tihngaihna a awm lo. Mizo ṭhalaite'n mi dang ṭanpui duhna leh nunna chhan chhuah duhna rilru neiin thisen kan pe ṭhin a; ṭhalaite inpekna a chhuakawm tak zet.

AVBD chuan Mizoramah thisen mamawhna an awm belh zel avangin thisen pek hi tawpsan mai chi a ni lo tih an sawi a, thisen pe chhunzawm zel tur leh uar lehzuala pe turin mipui an ngen. He ngenna hi Mizoram ṭhalaite chhàn lêt tur chi a ni a, thil tih hmanga chháng let turin ṭhalaite'n rilru kan siam a pawimawh.

Ṭhalaite hian Mizoramah thisen awm loh avangin mi an thi tur a ni lo tih rilru pu thei ila, thisen mamawhtu damlote'n an mamawh hunah tak thisen an dawn theih nan thisen pek kan uar zel a ngai. Thisen pe tawh ṭhinte'n uar lehzualin thisen pek tum ila, la pe ngai lote'n pek thar tum bawk ila; nunna hlu tak kan chhanhim zel thei ngei ang.