Mithiamte rawtna leh thlirna

Mizoram University leh Research Centres for Eastern and North Eastern Studies ṭang kawp chuan, 'Mizoram, gateway to South East Asia?' tih thupui hmangin seminar an buatsaih dawn a, he mi chungchang hi thuthar thehdarhtute hnenah an puangzar tawh a ni.

Tun hnaiah MZU-ah hian seminar leh workshop lian tham tak tak buatsaih ṭhin a ni a, hengahte hian India ram mai ni loin khawvel huapa mithiamte pawh an lo tel ṭhin. Heng inrawnkhawmnaah hian Mizoram chung-chang bakah subject hrang hrangte zirho ṭhin a ni a, ṭangkai zawka hman dan thiam a ṭha khawp mai.

A hminga Uni-versity hrang kan neih ve tak avang leh, UGC leh hmun dang aṭanga sum a awm vanga heng inrawnkhawmnate hi buatsaih mai a ni lo a, Mizoramin a taka hma kan sawnpui theihna tura buatsaih a ni. Heti chung hian zirlai (academic) thilah kan kal raltir mai ang tih a hlauhawm a, henga mithiamte thusawi leh thuziak aṭang hian ram tana ṭangkai tur ngaihtuah chhuah thiam a pawimawh takzek a ni.

Hemi kawngah hian Mizoram sorkar pawh a inhawn zau a ngai a, a officer leh staff neih sate thiamna hi sangin inchhiar zau viau mah se, zir binga (reserch) luhchilhtute hi chuan thil thar hriat belh an nei zel a, hengte hi rama tana chhawr ṭangkai dan thiam a ṭha hle ang. Hemi tiat chiah hian MZU lama mithiamte pawh an pawimawh tel a, an thil sawikhawm leh zirte hi an zirlai atan chauha an hman a, ram tana a taka hman theih tura an zir chhuak a nih loh chuan a ṭangkai tur angin a ṭangkai tawk lo fo ang.

Ramin hma a sawn dawn chuan mithiam a rawn zau a ngai a, kan ram roreltute leh kan mi thiamte hian inkawmhona hun ṭha nei tam se, ram rorelna kal zel dan turah hian mithiam rawtna lak thiam hi a pawimawh takzet a ni.