Ruihhlo ral doa do a ngai

Home minister R. Lalzirliana chuan, Mizoramah ruihhlo hi ral doa do a hun tawh tih a sawi. He thu a sawina hmun hi HIV/AIDS dona kawnga inrawnkhawmna hmunah a ni. HIV/AIDS natna Mizorama a darh chak em em chhan chu zalen taka sex hmang an tam vang a ni tih leh, sex a zalen chhan chu ruihhlo a zalen vang a ni tih hi home minister hian a hre chiang hle tih a hriat theih.

Survey hnuhnung bera a lan dan chuan, Mizorama HIV/AIDS vei dan dinhmun chu sawi lan hrehawm tham a tling. Chu chu ruihhlo leh sex vang a ni tih state sorkar pawhin a pawm tih a hriat. Ruihhlo do hi ralpui phiar taka phiar a ngai tih home minister-in a sawi chhuak ta hi a lawmawm hle. Tuna a lan danah hi chuan, ruihhlo do hna hi Central YMA hian hlawh nei loin ral do takin a do ngei mai a, nunna pawh thapin mi tlawmngaite zan tam an tlaivar tawh a, ruihhlo leh a zuartute pawh an man hnemin, a zuar hrat bikte pawh an man nawn ngun viau tawh a ni.

YMA ruihhlo do nan state sorkarin tun hnaiah cheng nuai sawm zet a pe a, YMA tan pawh a phurawm sawt ang. Hetihlai hian YMA-te ruihhlo man khawm sa urhsun taka hal raltua lo ṭan hi ruihhlo do kawnga sorkar tha thawh langsar lai ber ni mai hian a lang. Sual laka mipuite venghim tura nuai za tam tak senga rawihte ai hian, tlawmngaia thawk YMA-te lakah hian beisei kan tisang zawk palh thei.

Home minister sawi ang hian, sorkar te, Judiciary lam te, YMA te, Kohhran-te hian ruihhlo hi ral pui phiarin phiar tak tak ila, ṭhalai tam tak kan chhan him ang a, HIV/AIDS natna darh zel tur pawh kan veng ziaawm deuh thei ang tih a rinawm.