ATL Road leh sum pawhpên

Tunlai hian Aizawl-Thenzawl-Lunglei (ATL) Road kawnga Kanghmun South leh Lunglei inkar siamna tur sum vbc. 90 chuang zinga a zatve vel hmun danga hman turin pawhpên a nia hriat vangin Lunglei lama pawl ṭhenkhatin thâwm an nei mek.

Lungleia pawl ṭhenkhatin press release an siam a, ṭhenkhatin thuneitute hnenah lehkha an thawn a; nimin lam khan zirlai pawlte'n pungkhawmin lungawi lohna an lantir a ni.

Tun dinhmunah ATL Road-ah hian PWD Hmuifang Division enkawl chin chu a ṭha pangngai viau a, Lunglei Division enkawl chin erawh a ṭha lo a, hmun tam takah lirtheia tlân hrehawm khawpin a chhia. Kawng a ṭhat loh avang leh National Highway lam siam zawh hlim deuh a nih avangin chhim lam lirthei tam tak chu kawng hla zawk NH lamah an tlan ṭhin mek a ni.

Lunglei leh chhim lam khaw tam takin Aizawl an panna kawng pawimawh ber ATL Road ṭha lo hi a hmangtu mipui tan chuan a hrehawm hle ang tih a chiang a; mâm ṭha taka siam hlàn an nghakhlel hle ngei ang. Tun ṭhál chhung ngeia siam pawh an beisei hlein a rinawm.

Kum 2024/25 ṭhál (ruahsur loh hun chhung) a rei tawh a, ṭhâl a zo leh ṭêp tawh zawk. Mizoram khaw pui ber dawttu Lunglei leh khaw dang tam tak tana kawngpui pawimawh ATL Road-a kawng chhe laite tun ṭhâl chhunga mumal taka siam a ni lo hi a tuartu tan chuan a thinrimthlak duh viau àwm e.

Kawng siam hun nghahhlelh em em tawh lai leh ṭhál a zawh dawn hnaih tawh thlenga kawng siam mumal a la nih loh karah, kawng siamna tur sum awm tawh sa aṭanga tam tak hmun danga pawhpên vanga lungawi lohna lantir hial a ni pawh hi a awm viauah a ngaih theih.

Fûr a ni leh mai dawn a, ruah a sûr chhoh chuan tun aiin kawng a chhe lehzual dawn a, kawng siam pawh a harsa leh sauh dawn. Mizoram sorkar hian Mizoram khawpui pahnihna kawng pawimawh tak hi tun aia a ngaihsak lehzual a ṭul a; sum pawhpên a ni emaw, ni lo emaw, a rang thei ang berin Lunglei kawng chhia hi siam ngei rawh se.