Raltlante awmze nei zawka buaipui a ṭul

Tunlai hian sahimna zawnga Mizorama rawn ráltlân, a bikin Myanmar lam aṭanga rawn lutte chungchangah sawi neuh neuh a tam hle mai a, ngaimawhna leh hnawk tihna a lian sâwt viau niin a lang.

Raltlante chungchangah hian kum 2024-a YMA Rorel Inkhawm chuan, 'Mizorama raltlante awmna hmun tur, enkawl dan tur leh kaihhruaina mumal tak sorkarin siamin khauh takin kengkawh zui rawh se' tiin an lo rêl tawh. Chu chu YMA Central Coordination Committee April 9, 2025-a ṭhukhawm chuan 'Nasa zawka hmalak zel ni se' a ti zui bawk.

Mizorama ráltlân awmte hi Zo hnahthlak vek an ni tih theih a ni. Mizoram mi leh sate nen hnam khat kan ni a, chutih rualin, ram hrang mi, khua leh tui nihna (citizenship) hrang kan ni. Hnam khat, ram hrang ni hi kan nihna hi thil tiawlsamtu a nihna a awm rualin, thil tih tiharsatu a ni ve bawk.

Myanmar leh Bangladesh aṭanga kan hnampui, kan unau raltlante hi India khua leh tui an ni lo. Chutih laiin, an zinga mi eng emaw zat chuan India khua leh tui nihna an nei tawha sawite a awm a; a zialo hle. Hei vang hian India khua leh tui dik takte chanvo ei hêkah leh khawtlang nunah pawh sualna tipungtua ngaihna a lian sâwt hle niin a lang.

Zo hnahthlak raltlan, a bikin Myanmar lam aṭanga rawn kalte chungchangah hian chhan hrang hrang avangin sorkar, pawlte leh khawtlang hruaitute bakah mipui kan fimkhur tlân a ngai hle dawn.

Sorkar hi ram enkawltu, thuneitu a nih angin mawhphurna nei sang ber ni a, kan unau raltlante chungchangah hian tun aia mumal zawka a kal a ṭul tawh hle. YMA pawhin an lo rêl tawh angin, sorkar hian raltlante awmna hmun tur, enkawl dan tur leh kaihhruaina mumal tak a siam a ṭul tawh tak meuh a; mumal taka a kim thei ang bera raltlante chhinchhiah a ṭul hle bawk.

Tunlai boruak uluk taka thlir chungin sorkar hian mumal zawk, chak leh khawng zawka raltlante a buaipui loh chuan unau karah tharum thawhna hial thleng palh thei a ni. Chutiang a thlen lohna turin sorkar hian chak awmze nei zawk leh chak zawkin raltlante hi buaipui rawh se.