Transport vehicle permit pekah fimkhur

Transport Minister chuan maxicab neitu pawl inkhawmpui April 10, 2025-a a hmanpuinaah, lirthei permit hrang hrang dilna tam mah se, induhsakna vanga awmze nei loa permit pek an duh ve loh thu leh mipui mamawh mila an pek dawn thu a sawi.

Minister hian lirthei, a bikin passenger phur lirthei khalhtute fuihna thu eng emaw zat a sawi a; rûi chunga khalh lo tur te, passenger-te tana hlauhawm zawnga khawsa lo tur te, phone hmang chunga khalh lo tur te, sorkarin chuan man a bituk aia sang la lo turtein a chah. Lirthei khalhtute zawm ngei ngei chi vek a ni.

Transport Minister-in induhsakna vanga passenger phur lirthei permit pek an tum loh thu leh mipui mamawh tâwk mila pek an tum thu a sawi hi a ṭha hle mai a; sawi ringawt ni loin, a tak taka kalpui ngei chi a ni.

Hun hmasa lamah four wheeler taxi leh two wheeler taxi permit-te sorkarin an lo thei sem titih tawh a, party mite leh an mi duhsak zawngte an lo pe chiam tawh ṭhina sawi a ni ṭhin. Chuvang chuan khawpuiah, a bikin Aizawlah mipui awm zat leh kawngpui awm dan mil tâwk aia tam taxi a awm a, intlân chhâwk a ngaih phah a; mipui leh taxi neitu/enkawltute ngeiin an tawrh phah a ni.

Mihring phur chi sumdawnna lirthei (public transport) permit pek hi mi eizawnna siamsak tum vanga pek chi a ni lo; eizawnna insiamsakna tur ni se, mamawhtu pek tur an tam lutuk. Eizawnna insiamsakna tur ni loin, mipui náwlpui kal velna a awlsam zawk nan mipui mamawh mil tawk zela inpek chi a ni zawk.

Aizawl leh khawpui dangte dinhmun enin, tun dinhmunah chuan public transport vehicle hi kan khawpuite leh a chhunga chengte hian hian kan mamawh belh rih loin a lang a; sorkarin permit dilna dawn sa eng emaw zat nei mah se, tunah chuan pek chhuah belh a ṭul rih lo a tih theih.

Transport Minister-in public transport vehicle permit pek chungchanga mipui vantlang hriata a sawi tawh hi a takin sorkar hian kalpui ngei se; permit chi hrang hrang dilna an kawl mekah pawh uluk leh fimkhur taka ngaihtuahin thutlukna siam zel rawh se.