DoNER secretary rawtna leh Mizoram

DoNER ministry leh North Eastern Council (NEC) kaltlanga Mizorama project leh scheme hrang hrang thawh mekte thlirletnaa (review meeting) thusawitu, DoNER secretary chuan thingpui, mau leh rua, sangha khawi, ran vulh leh tourism-te chu Mizoramin theihna a neihna nia sawiin, chu'ngahte chuan ruahmanna lian tham siam turin Mizoram sorkar official-te a chah. 

Mizoram sorkarin hmasawn a duh a, hna­thawh tumin rua­hmanna hrang hrang a siam ṭhin a, nimahsela a mamawh ang sum a neih loh ṭhin avang leh state-in thawh chhuah a neih bawk si loh avangin hmasawn a harsa a, India ram state hnufual pawl kan ni rei ta hle. 

Dik tak chuan kan phur hluaia thil kan rawt chiam ṭhin a, a zirchianna lam kan nei lo a, a bawhzui lamah kan ṭha lo bawk nen, kan rama sum lo lut hi kan hmang ṭangkai lo. Kan hotute sawi ṭhin angin engkim ṭhat duhna rama cheng kan ni a, mipui nuai 10 bawr vel din chhuahna tur chu sum a lo lut ngei a, a hman dan kan thiam tawk lo a, ruahmanna a ṭha lo a, tun hi kan thleng. 

Tun hnaia DoNER secretary lo kal thu­sawi hi ngun taka chhinchhiaha bawhzui ni ta se, awmze nei thama hmasawnna hmuh theih a beiseiawm ang. Kan pawisa zuk dil lehna tur lamin an ngaih pawimawh hi ngai pawimawh thiam ila, chu chu a bawhzui kawngah taima ila, kan thiamna a sang emaw sang lo emaw kan official lamte pawhin sorkar laipui dawr turin huaisenna leh taimakna nei se, kan minister-te'n ṭhahnemngai takin bei zui bawk se, he ram tihmasawn tur hian theihna an nei ngei ang. 

DoNER secretary rawtna leh Mizoram