Aizawla khâmte ngaihven a ṭul

April 10, 2025 tlaia Ngaizèla lung tlain kawngpuia two wheeler-a tlân lai mi pahnih a delh a, mi pakhat thiin, pakhat a hliam. He thil thleng hi a vanduaithlak a, a pawi hle.

Disaster Management & Rehabilitation Minister leh Aizawl South-III MLA chuan thi chhungte hnenah vanduaina thlen tûk, April 11-ah sorkarin a ràlna Rs 4,00,000 an hlan nghal a; khawmuang loa sorkarin ràlna a pe nghal erawh a lawmawm.

Ngaizêl hi khâm a ni a, tun hma aṭang tawhin kawng chhak lam khâm aṭangin kawngpuiah lung a tla tawh ṭhin a; ṭhenkhat chu tenau deuh a nih laiin, lian tham taka a tlâk ṭum pawh a awm. Lung tlain mihring leh lirthei a delh ṭum pawh a awm tawh ṭhin a, mihring thih phah leh na taka hliamte pawh an lo awm tawh ṭhin.

Aizawlah hian kawngpui chhak lam khâm tak tak a awm nual a; Ngaizel bakah, Chanmari-Chaltlang kawng te, Chanmari-Ramhlun South kawng leh, Bawngkawn- Durtlang Leitan kawngte hi khâm hlauhawm zual, kawng chhak lam ko aṭanga lung a tlak ṭhinna hmun niin a lang. Hengah hian lung tlain mi a delh hlum a awm deuh vek tawh. Henga vanduaina thlen hun hi fûr lai a nih deuh ber rualin, ṭhál laia thleng pawh a awm nual tho bawk.

Vanduaina hi pumpelh vek theih a ni lo a, Aizawla khâm hrang hranga lung tlain chhiatna a thlen ṭhin pawh hi vên vek theih a ni lo ang. Chutih rualin, fimkhurna hmangin vanduaina kan tih tam tak hi chu vên theih leh pumpelh theih a ni.

Kawngpui chung khâm aṭanga lung tla vanga chhiatna a thlen loh tawh nan leh, lung a tlak palh pawha mihring a delh tawh loh nan leh thihna hial a thlen tawh loh nan a venna lam hi leilunga chhiatna thleng ṭhin chungchangah mawhphurtu sorkar thuneitute'n tun aia an ngaihsak lehzual a ṭul.

Ṭhál a la ni mek a, fûr a ni leh mai dawn. Ṭhál lai hi fûra chhiatna thleng thei laka invênna tur ngaihtuah hun, inbuatsaihna hun ṭha a ni. He hun hi thuneitute'n ṭangkai lehzuala an hman a ṭul tak zet.

Ngaihsak loh vang leh invênna lam ngaihthah vangin Aizawlah a ni emaw, khaw dangah pawh, khâma lung tla vangin thihna thleng lo se duhthusam a ni a; chutiang tur chuan hmalak ran a ṭul. Mihringin kan paltlang tam zual khâm hrang hrangte hi lên hmanga tuam ni ta se, invenna ṭha tak a ni mai thei. Thuneitute'n ngun lehzuala ngaihtuahna sêngin hma han la rawh se