Hnam dang huat ngawt tur a ni lo

Bru Student Association-in April 12, 2025-a Vanapa Hall-a Bru kum thar kût, Boisu an hmannaah Chief Minister-in Tanhrilah Bru House cum Hostel sak thuai a nih dawn thu leh a sakna tur sum a awm tawh thu a sawi. CM thusawi hi mi ṭhenkhatin politics-a inbeihna atan an hmang leh mek.

Mizoram sorkarin India ram khawpui hrang hrangah hmun leiin Mizoram leh Mizote inpui tia sawi theih Mizoram House eng emaw zat a din tawh a; chungte chu Mizo mipuiin kan hmang ṭangkai em em vek a, thil tih khawm nikhuaah a ṭangkai lehzual. Mizoram House awmna state mipuite hian hnawksak tiin, Mizoram House din emaw, hman emaw phal lo ta se, pawi ti tur leh ná ti tur chu Mizote kan ni.

Mizorama sorkar ding tawhte pawhin hnam bil ṭhenkhat pualin Aizawlah in (house) an lo dinsak tawh a, ṭangkai takin an hmang mek. An tan chuan Aizawla an inpui ber a ni a, state danga Mizoram House-te ang bawkin chhiat tawh thilah an hmang ṭangkai zual niin a lang.

Mizoram sorkarin Aizawla Bru House cum Hostel sak a tum hi thil ṭha a ni a, Bru mipuite'n an hmang ṭangkai hlein a rinawm a; tihpuitlin ngei ni se a duhawm.

Sorkarin Aizawla Bru House cum Hostel sak a tum hi mi ṭhenkhatin politics-a inbeihna atana an hmang hi a zialo hle. Politics-a inbeihna atan phei chuan hman chi a ni lo; a chhan chu Mizorama political party-te hi Mizorama khua leh tui dik tak Bru-te vote duh vek, inthlan dawn apianga tlawn ṭhin an ni deuh vek. Bru-te tana thil tihsakah inpuh bik tur emaw, an tana thil tihsakte sawisel bik tur an awm lo.

Mizoramah hian hnam hrang hrang kan chêng a, Mizorama chêng nghette chu khua leh tuite kan ni. Mizoram khua leh tui dik takte hi chu hnam dang (Mizo ni lo) pawh ni se, an duh rêng vanga Mizoram an pêm chhuahsan a nih ngawt loh chuan kumkhuaa kan rama kan chenpui turte an ni. Chuvang chuan inngeih tak leh lungrual taka kan khawsapui thiam a ṭha ber.

Mizote hian Mizorama hnam dang awmte hi kan haw ngawt tur a ni lo a, kan chênpui thiam tur a ni. Hnam dangte pawhin hnam tlem zawk an ni tih inhriain, Mizote zai ngai thiam taka an khawsak a ṭul ve bawk.