Ruihhlo donaa chêt dan

Excise & Narcotics Department chuan kumin 2025 January-March chhungin heroin kg. 15.192 leh methamphetamine kg 44.111 an man a, rakzu litre 18.013.980 leh sapzu ûm 5,924 leh ruihhlo dang eng emaw zat an man bawk.

Mizoramah ruihhlo a hluarzia kan hre tlang a, kumina thla thum lek chhungin Excise & Narcotics chuan heroin kg. 15 leh gram 192 lai an man dêr tawh a; hei hi hawng 1,215 vel a ni. Hei bakah hian Police, Assam Rifles leh agency dangte'n an man eng emaw zat a awm bawk ang.

Kan rama ruihhlo hluar ber chu heroin (no. 4) a ni. Kum eng emaw ti kal ta aṭang khan heroin man a ni deuh reng a, mipui náwlpuiin an ngaihven em em lo a, ṭum khata heroin man tam ber ṭumah pawh mipui náwlpui chuan an ngaihven lem lo.

Tun hnaia Police-te'n heroin hawng 440 man a, heta ṭang chiah hian mipui náwlpuiin ruihhlo (heroin) an ngaihven ta niin a lang a; hawng 440 neitua puh zinga mi pakhat vang a nih a rinawm.

Kan ramah ruihhlo, a bikin heroin hi Mizo ṭhalai tam takin an chhiatpui tawh a, chhungkaw tam tak mangangin an rûm phah tawh. Tunah Mizo náwlpuiin ruihhlo chungchang leh ruihhlo do lam an ngaihven ta hi a lawmawm a, kan ram kal zel turah thil ṭha zawk thlentu ni ngei se a duhawm.

Ruihhlo hi nasa taka do a ngai a, sorkar chauh emaw, tlawmngai pawl tute emaw chauh emaw, kohhran chauh emaw ten an do hneh mai chi a ni tawh lo. Ruihhlo do tur hian sorkar, pawl, kohhran leh mipui náwlpui hi kan ṭanrual a ngai tawh a ni.

Mizo zinga tam tak hi mi hausate tlawn ṭhin, khawtlangah pawh duhsak bik, pawi an khawih ve pawha tâng hlei thei loa ngaihna leh, mi harsa zawkte duhsak lo, ngaihsak lo leh hnuaichhiah ṭhina ngaihna a lian ṭhin. Chumi avang chuan mi tam tak rilruah chuan mi hausa deuhte duhsak bik ve lo leh mi rethei zawkte khawngaih anga inlantir duhna rilru put phah ta leh chumi avanga ngaihtuah chiang mang loa lan chhuahtir chiam pawh thil awm ve thei a ni.

Ruihhlo donaah hian fimkhur taka kala chêt a ṭul a, dan pêla chêt te, tharum thawhna uchuak lakahte inven a ṭha a; dan anga chet a ṭha ber. Hausa leh rethei thliar tur a ni lo a; mi rethei an nih avangin diriam bik tur a ni lo a, mi hausa leh langsar an nih avangin diriam uchuak bik tur a ni hek lo.