Eirawngbawlna gas

Central YMA chuan thuchhuah siamin, eirawngbawlna gas tichingpen ṭhin leh black-a zuar ṭhinte laka ram puma beihpui thlak zel turin Mizoram mipuite a ngen a, gas lak dawnah bûk zel turin YMA branch tinte a chah bawk.

Mizorama thil ngaihven hlawh tak ni mek chu eirawngbawlna gas tihchingpen chungchang hi a ni a, a tichingpentute man chhuah an nih hnuah he buaina hi a la inṭan dawn chauh niin a lang. Central YMA lamin Mizorama gas hmante hi a buk a tling lo nasain tihchingpen ngei a ni ṭhin tih an finfiah hnuah an khawih chingpenna hmun an luhchilh a, an man ta ngei a; amaherawhchu man chhuah an nih hnuah heng mite hian harsatna an siam zui ta a ni.

Chief minister hoin eirawng-bawlna gas tihchingpen chung-chang hi ngaihtuah a ni tawh a, hei hian awmzia a nei turah ngai ila; nimahsela chief minister meuh a inrawlh hnua he harsatna hi a la awm zel a nih chuan, amah chief minister tan ngei pawh mualphona a ni thei.

YMA lamin theihtawp an chhuah chhunzawm zel hi an fakawm a, an rawtna siam ang hian he thilah hian Mizorama chengte kan ṭanrual a ngai hle. Dan loa black-a gas hralhte hi inthuruala do ngam a ngai a, hetiang ti ṭhinte man chhuak tura ṭan rual a hun tawh khawp mai.

Eirawngbawlna gas tichingpen man chhuah nghawng nia lang chu tuna gas vang mek hi a ni a, misual man chhuah an nih tak avanga anni lam inthurualin Mizoram mipuite min hrek duhna thinlung an pu a nih chuan, an thiltih avanga an inchhir ngei theihna turin sorkar a chet ngam a ṭul ta.

Tunlai khawvelah dan zah thiam a pawi-mawh a, dan bawh--chhe si loa he harsatna sutkian dan zawn thiam hi a ṭul a, Mizote eirawngbawlna gas ngheitir hreh lo khawpa hmalatu hi an awm tak tak a nih ngai chuan, sorkar chakna nen theihtawp chhuaha nawr a hun takzet tawh a ni.

Mizorama eirawngbawlna gas vang mek ching fel turin thuneitu lamin ṭan la se, chief minister ho meuha rel tawh thilah hian a tuartu lamah mipui an ṭang thiang lo a, mipuite tana harsatna siamtu an awm a nih chuan dan anga na taka kal a hun takzet a ni.