Samkhuih Joint Operation

Aizawl chhuah lama kawngpui, Aizawl khawpui helna atana siam, Aizawl by-pass road, World Bank road tia hriat bawkin a hrut veng paruka YMA chuan Samkhuih Joint Operation tia vuahin he kawngpui kam vel hi thenfai an tum. He lai hmun velah hian nula leh tlangval hlimhlawp bawl, hmuh hrehawm zawnga chetla hi ni tin ṭhahnem tak an awm ṭhin avangin, khawtlang nun siam ṭhat programme bawhzuina atan he samkhuih joint ope-ration beihpui hi thlak an tum a ni.

A ngaimawhtu lam, khawtlang siamṭhat hna thawktu YMA-te tan chuan, he kawngpui kam velah hian, kawngpui aṭanga lang phakah leh a chhehvelah hian, intihlim pawl hi englai pawhin, chhun leh zanah pawh an awm deuh reng a,
ṭhenkhat chu ṭhianho inkawmhlim an ni ngei a, ṭhenkhat chet dan erawh chu khawtlang siamṭhat duhtu pawl tan chuan ṭha-en mai harsa tak takte pawh a awm ve bawk a, a bul hnaia YMA-te tan chuan, thenfai hna thawh hi a awm viau reng a ni.

Tun hma aṭangin, Aizawl khawpui chhehvel hmun remchang hrang hrangah nawmsip bawla punkhawmna hmun hi a awm fo ṭhin. Veng hnaivaia tlawmngai pawlten ngaimawhin an hnawt darh a, hmun dang remchangah an insawn ve zel bawk. Phalna neia zu zawrh a nih chang apiangin hetiang hi a hluar ve zel a, khawtlang mit tikham zawnga hmeichhia leh mipa khawsak pawh a tihluar hle a ni.

Inkawm tura khaw dai pan a ngaih chhan hi khawpui chhungah inkawmhlimna hmun ṭha a awm tawk loh vang a ni thei a, ṭhalaite zingah nun bawraw an
ṭhathnem tawh vang a ni thei bawk. Tlawmngai pawlte an chet chuan danin a daih loh chin a awm leh thuai ang. Dan kengkawhtu lamten ruahmanna thar siam thei se. YMA hnatlang tha rin leh ngawt hi sorkar ngaihtuah dan tur a ni lo ang.