CSS hnuaia thawkte nuar hi
Mizoram sorkara centrally sponsored scheme hnuaia thawkte chuan thawk rei tawhte state sorkara dah ngheh phûtin lungawi lohna an lantir mek. Chief Secretary mawhphurhna la mektu erawh chuan CSS hnuaia thawkte zinga dan loa lakte dah ngheh theih an nih loh thu leh, an nuar zui zel a nih chuan 'no work, no pay' anga kal a nih dawn thu a sawi.
Chief Secretary mawhphurhna la mektu sawi danin, CSS hnuaia thawkte zingah CSS Employees Regularisation Scheme hmanga dah ngheh theih loh, dan loa lak eng emaw zat an awm a; advertisment chhuah loa lak te, DPC kaltlang loa lak te, recruitment mumal lo leh open competition awm loa lak te, indusakna vanga lakte tam tak an awm. CSS Regularisation Scheme hmangin advertisment chhuah thlapa DPC/DSC-in an lakte erawh chu dah ngheh theih an ni.
CSS hnuaia thawkte pawl AMCECC erawh chuan, appointment order mumal tak neia lak vek an nih thu an sawi a; dan dik loa lak an awm a nih chuan dan loa latute chungah na taka hma la turin sorkar an phût thung.
Chief Secretary charge la mektuin a sawi anga dan loa CSS hnuaia thawk tur lak an tam a nih chuan, dan loa lakte chungah dan anga hmalak mai hi thil nih dan tur niin a lang. Dan anga lakte leh dan loa lakte ang khata ena vaihma vek te, CSS Employees Regularisation Scheme a taka kalpuina dâltua hman tlatte a dik bik lo ang.
AMCECC sawi angin, CSS hnuaia thawk tura dan loa thawktu late chungah sorkar hian hma a lak a ṭhain a rinawm a; thil dik lo, dan loa thil titu na nâ nâ chu dim tur an ni lo. Hengte avang hian Mizoram sorkara CSS hnuaia thawkte hi sorkarin a thliar bakah, AMCECC pawh anmahni an inthliar a ngaiin a rinawm.
Mizoram sorkar hi hun rei tak CSS hnuaia thawkteah a innghat tawh a, hna pawimawh tak takah a hmang ṭhin. Hna an thawh loh chuan sorkar hna pawhin a buai phah hlein a rinawm. An pawimawhzia sorkarin a hriatpui ngei ang a, an thil phût pawh hi danin a phal chinah tihhlawhtlin dan a ngaihtuah a ṭha ang.
A pawimawh ber chu Mizoram mipuiin an tawrh lohna tura hmalak a ni a, sorkarin fîm takin ngaihtuah se. Dah ngheh theih leh theih loh an awm chungchangah inpawh taka sawi tlân a, a lehlam lehlamin inhriatthiamna an neih ve ve a ṭul.