FMR tihtawp leh ramri hung

Union Home Secretary chuan April 15, 2025 khan Delhi-ah Central YMA, MHIP, MZP, MSU leh ZORO aiawhte a kâwm a; Free Movement Regime, ramri hung leh thil pawimawh dangte a sawipui.

Sorkar laipuiin Free Movement Regime titawp leh India-Burma ramri hung tuma hma a lakna dodal lo tur leh sorkar laipui hmalakna thlâwp turin Home Secretary hian tlawmngai pawlte hi a ngen a ni.

FMR leh ramri hung chungchanga NGO Coordination Committee anga ngaihdan awm sate NGO hruaitute chuan Union Home Secretary an hrilh a; Mizoram mipui ngaihdan leh duh dan ngai pawimawh thiam turin an ngen lêt. NGO-te ngaihdan awm sa chu FMR tihtawp loh leh ramri hung loh a ni.

Social media-ah mi tam takin an ngaihdan an sawi bawrh bawrh a, chutihrualin, ngaihdan sawi chhuak lem lo an la tam zawk hlein a rinawm. Social media-a ngaihdan langsar tak takte hi thil ṭhenkhatah Mizoram mipui náwlpui ngaihdan tak tak a ni thei a, thil ṭhenkhatah chuan Mizoram mipui tam ber ngaihdan a ni lo thei bawk.

Media ṭhenkhat, a bikin social media-te aṭanga a lan dan chuan, tunlaiin Myanmar lam aṭanga himna zawnga rawn tlân lutte hnawk tihna a lian sâwt hle. Myanmar lam aṭanga rawn lutte hi ruihhlo tawlhruknaah an inhnamhnawih tam deuha a lan vang leh pawikhawihna eng eng emawah an hming a lan ve fo vang niin a lang.

Social media aṭanga thlir chuan Mizoram leh Myanmar ramri hi hung duh an tam viau tawh niin a lang a, Mizorama ruihhlo a hluar dan ngaihtuahin a àwm viau. Kan ram tana thil ṭha zawk tur pawh a ni tak tak reng mai thei.

NGO Coordination Committee erawh chuan tun dinhmunah chuan ramri hung loh leh FMR tihtawp loh hi an dinna a ni a; hei pawh Mizoram leh Mizote hma lam hun thui tak thlirin, thil ṭha zawk a ni thei bawk.

A bikin ramri hung chungchang hi Mizoram leh Mizo náwlpui tana ṭha ber tur fím leh uluk taka ngaihtuah a ṭul. Mimal ang leh pawl anga ngaihdan kan lo neih tawhte hi hun kal zelah a lo ṭha lo zawk thei. Ngaihdan kan neih tawh hi sahuai thing vawn tlur loa thlak a ṭhat zawk cháng a awm thei a, ngaihdan thlak theia insiamrem thiam a ṭul.

Tunah chuan ruihhlo hi Mizoram buaina lian tak a ni. Ruihhlo do hneh tur emaw, tirêm tur emaw, titlem tur emaw hian ramri hung hian awmzia a nei viau thei a, awmzia a nei thûk lem lo thei bawk a; hemi chungchangah pawh hian ngun taka zir chian a ṭha hle ang.