Kawngpui siam vil uluk ni rawh se

Aizawl khawpui chhung kawngpui siam (resurfacing) hna chu April 15, 2025 zan khan ṭan a ni a, sorkarin a lâk urhsûn vang ni maw, PWD Minister ho meuhin kawng siam ṭanna hun hman a ni.

Aizawl chhung kawng siam turah hian km. 84-a thui siam a ni dawn a, thla 18 chhunga siam zawh hman tura ruahman a ni. Kawng chhe lai thawm ṭhat ringawt ni loa puitling taka kawng siam ṭan a ni ta leh kawng tlo zawk siam a nih theihna tura state pawn aṭanga lung ṭha lak luh a ni hi a lawmawm.

Kawng siam hi ṭha leh tlo a nih theih nan contractor thlan an uluk thu te, kawng siam dan tur ang taka siam a ni em, bitumen pawlh dan, temperature, a chhah zawngte uluk taka vil zui a nih dawn thute PWD Minister-in a sawi. Hei hi a pawimawh hle mai a, kawng siam dan tura tih ang takin a siamtute'n siam se, sorkar pawhin uluk takin vil ngei rawh se.

Kawngpui hi ṭha taka siam ni mah se, dim loh chuan a tlo tur angin a tlo thei lo a, a chhe leh mai ṭhin. Hetah hian mipui an pawimawh a, kawng tlo leh tlo loh hi mipuiah thui tak a innghat. Kawngpuite hi dimdawi a ngai a, iron rod chhut ngil leh lirthei silna leh insûkna thli luantir nante hmang tawh lo ila a ṭha hle ang.

Tuna Aizawl chhung kawngpui siam avang hian kan khawpui bera kawngpuite chu a ṭhat phah ngei ang. Mahse, Aizawl khawpui chhung kawngpui a ṭhat viau a, khawpui dangte leh khaw kar kawngte a ṭhat ve si loh chuan hmasawnna rualkhai lo tak a ni thei. Sorkar hian khawpui dangte leh thingtlang lama khaw chhung kawngte leh khaw kar kawngte pawh ngaihthah loin ṭha zawkin siam zel se.

Kawngpui ṭha hi sorkar ṭha leh ṭha lo tehna pawimawh tak a ni a, sorkar ṭhat leh ṭhat loh lansarhna ber pakhat a ni a, sorkar hmingṭhat theihna leh mualpho theihna a ni. Sorkar hian khawlai hmunah pawh kawngpui ṭha nei turin theihtawp chhuah zel rawh se.

Kawngpui hi mi tin mamawh, mi nâwlpui chhawr theih a ni a, hmasawnna ruhrel dinna tura pawimawh ber pakhat a ni. Sorkar hian ram leh hnam hmasawnna tur thil chi hrang hrang zingah kawngpui ṭha siam hi a ngai pawimawh em em reng tur a ni.