Chhungkaw Krismas

Vawiin, December 25, 2020 hi Krismas ni a ni a, khawvel pumpuiah he ni ropui tak hi läwm a ni ang. Kumin Krismas erawh khawvel pumah a läwm dan boruak a dang deuh dâwn a, Covid-19 avangin kum dang anga läwm a ni thei dâwn lo.

Mizorama Kristianna a luh hnuah Krismas hi ropui taka läwm ṭhin a ni a, ram buai boruak karah pawh kohhran hoin a huhoin Krismas hi chu läwm ṭhin a ni a, khawtlang huapa ruai nena läwm a ni ṭhin. Kumin erawh chu a huhoa Krismas läwm loin kan hmang dâwn chu a ni ber a, a khawharthlak zawnga thlirtu tán chuan Krismas khawharthlak tak a ni ang.

Chutihlaiin chhungkuaa Krismas hmanna hun remchang ṭha tak a ni a, kum danga thil tih remchang lo ṭha tam tak a tih theih thung dâwn a ni. A huhoa nuam taka Krismas lawm thiam tak Mizote hian chhungkuaa Krismas hman kan zir kumah hmang ila, he Krismas hian kan chhungkuaah hriatreng tlak rah duhawm tak chhuah se a lawmawm ngawt ang.

'Kristian ram, inkhawm tamna ram leh kawng hrang hranga kohhranin min thunun ṭhatna ram ni si kan khawtlang nunah Kristianna a lang lo,' tia kan sawi fo chhan lian tak pakhat chu chhungkaw nuna Kristianna la lut loa 'huho Kristian' ang maia kan awm ṭhin vang a ni pakhat a, kumin Krismas-ah hian chhungkaw hlutna zir chhuak tel ila a lawmawm ngawt ang.

Vanglaini chuan Mizo mipui zawng zawng Krismas Chibai a buk a che u.